एजेन्सी – वर्षाको कारण इन्डियन प्रिमियर लिग (आइपिएल) २०२३ को फाइनलमा चेन्नई सुपर किंग्स र गुजरात टाइटन्सबीचको खेल प्रभावित बनेको छ । खेल नेपाली समय अनुसार निर्धारित समयमा ७ः ४५ मा गुजरातको घरेलु मैदान नरेन्द्र मोदी रंगशाला अहमदाबादमा सुरु हुनुपर्ने थियो ।

टस ७ : १५ मा हुनुपर्ने थियो । तर रंगशालामा निरन्तर वर्षाको कारण खेल प्रभावित बनेको छ । केहि समय वर्षा रोकिएपनि पुन वर्षा भएपछि खेल ढिलो सुरु हुने र ओभर घट्ने देखिएको छ ।

यदि ९ : ५० भित्र खेल सुरु भएमा ओभर घट्ने छैन । खेलको कट अफ टाइम १२: २१ हुँदा उक्त समय सम्म खेल सुरु भएमा ५-५ ओभरको हुनेछ । यदि उक्त समयमा पनि खेल हुन नसके सुपर ओभर हुनेछ । चेन्नई पाँचौं पटक र गुजरात लगातार दोस्रो पटक उपाधि जित्ने सोचमा हुनेछन् ।

विश्व क्रिकेटकै एक सर्वाधिक सफल कप्तान धोनीको सम्भव त यो आइपिएल अन्तिम खेल हुने हुँदा चेन्नई उपाधिका साथ बिदा गर्न चाहन्छ । धोनीको उत्कृष्ट कप्तानी सामू गुजरातको परिक्षा हुनेछ ।

चेन्नईले पहिलो क्वालिफायरमा गुजरातलाई १५ रनले हराउँदै फाइनलमा स्थान बनाएको थियो । गुजरातले दोस्रो क्वालिफायरमा मुम्बई इन्डियन्सलाई ६२ रनले हराउँदै फाइनलमा भेट पक्का गरेको हो । आइपिएलमा चेन्नई र गुजरातबीच चार खेल भएका छन् । जसमा चेन्नई एक र गुजरात तीन खेलमा विजयी भएका छन् ।