काठमाडौं (हाम्रो खेलकुद) – नेपाली क्रिकेट टोलीका कप्तान रोहित पौडेलले आइसिसी एकदिवसीय विश्वकप छनोटमा जिम्बावेविरुद्ध अपेक्षा अनुसार बलिङ गर्न नसक्दा हार्न पुगेको बताएका छन् ।

‘हामीले सोचे अनुसार बलिङ गर्न सकेनौं । विशेष गरि मध्यक्रममा राम्रो हुन सकेन । हामीले राम्रो गर्न सक्थ्यौं । तर उनीहरुले वास्तवमै राम्रो ब्याटिङ गरे । २८० देखी ३ सय रनको योगफल राम्रो हो । तर मैले पछि विकेट देखेपछि १५/२० रन हाम्रो लागी कम भएको थियो । सायद ३१०-३१५ रनको योगफल बराबर हुनसक्थ्यो’, रोहितले हारपछि भने ।

‘हाम्रो पछिल्लो समय ब्याटिङमा लक्ष्य पछ्याउँदा राम्रो गर्दै आएका छौं । तर दोस्रो र पहिलो इनिङ बराबर हो । हामीले अव अमेरिकासँगको खेललाई हेरेका छौं । हामी सुपर सिक्समा पुग्न उत्सुक छौं’, रोहितले भने ।

त्यसअघि जितको लागी २ सय ९१ रनको बलियो विजयी लक्ष्य पछ्याएको जिम्बावेले ४४.१ ओभरमा २ विकेट गुमाउँदै पूरा गर्यो । जिम्बावेको जितमा क्रेग इर्विनले १ सय २८ बलमा १५ चौका र १ छक्कासहित १ सय २१ रनमा अविजित रहे । सेन विलियम्स ७० बलमा १३ चौका र १ छक्कासहित १ सय २ रनमा नट आउट रहे ।

त्यसअघि हरारे स्पोर्ट्स क्लबमा टस हारेर पहिला ब्याटिङको निम्तो पाएको नेपालले निर्धारित ५० ओभरमा ८ विकेट गुमाउँदै २ सय ९० रन बनाएको थियो । नेपालका ओपनर कुशल भुर्तेलले ९५ बलमा १३ चौका र २ छक्कासहित सर्वाधिक ९९ रनको योगदान दिएपनि टोलीको जित दिलाउन सकेनन् ।

जिम्बावेका रिचर्ड न्गारावाले ९ ओभरमा १ मेडनसहित ४३ रन खर्चेर ४ विकेट लिए । नेपालले दोस्रो खेल मंगलबार अमेरिकासँग खेल्नेछ । समूह ए मा नेपाल, जिम्बावे, वेस्टइन्डिज, नेदरल्यान्ड्स र अमेरिका छन् । समूह बीमा श्रीलंका, स्कटल्यान्ड, आयरल्यान्ड, ओमान र युएई छन् ।