काठमाडौ (हाम्रो खेलकुद) – नेपाली क्रिकेट टोलीका शीर्षक्रमका ब्याटर भीम सार्कीले आइसिसी एकदिवसीय विश्वकप छनोटमा अमेरिकाविरुद्ध अर्धशतक पूरा गरेका छन् । भीमले ९७ बलमा आफ्नो ओडिआई करिअरको तेस्रो अर्धशतक पूरा गरेका हुन् । भीम ९८ बलमा ४ चौकासहित ५२ रनमा क्रिजमा छन् ।

जितको लागि २ सय ८ रनको मध्यम विजयी लक्ष्य पछ्याएको नेपालले ३७ ओभरमा ४ विकेट गुमाउँदै १ सय ६३ रन बनाएको छ । ओपनर कुशल भुर्तेल ५४ बलमा ४ चौका र १ छक्कासहित सर्वाधिक ३९ रन बनाउँदै आउट भए । स्पिनर नोष्तुश केन्जिगेको १७ औं ओभरको दोस्रो बलमा कट एण्ड बोल्ड आउट भए ।

अर्का ओपनर आसिफ शेख १२ रनमा सौरभ नेत्रवालकरको बलमा एलबीडब्लू आउट गरे । आसिफले चौथो ओभरको दोस्रो बलमा जीवनदान पाएका थिए । तीव्र गतिका बलर कायल फिलिपको चौथो ओभरको दोस्रो बलमा आसिफको क्याच ब्यक्तिगत ६ रनमा फाइन लेगमा निसर्ग पटेलले क्याच छाड्न पुगेका थिए ।

भीम सार्कीले ब्यक्तिगत ९ रनमा जीवनदान पाएका थिए । फिलिपेको १० औं ओभरको अन्तिम बलमा फस्ट स्लिपमा स्टिभ टेलरले क्याच छाड्न पुगेका थिए ।

कप्तान रोहित पौडेल २९ बलमा २ चौकासहित १६ रनमा आउट भए । स्पिनर निसर्ग पटेलको बलमा रोहित जेसी सिंहबाट क्याच आउट भए । कुशल मल्ल १३ बलमा १ चौका र १ छक्कासहित १३ रनमा आउट भए । कुशल स्टिभ टेलरको बलमा लङअफमा सिंहबाट क्याच आउट हुन पुगे ।