काठमाडौं (हाम्रो खेलकुद) – नेपाली युवा टोलीले एसिसी इस्ट जोन कपमा समूह चरणको अन्तिम खेलमा घरेलु टोली मलेसियाविरुद्ध खराब ब्याटिङ गर्दै संकटमा पुगेको छ । बायोमास ओभल क्रिकेट मैदानमा टस जितेर पहिला ब्याटिङ रोजेको नेपालले २० ओभरमा ६ विकेट गुमाउँदै ८५ रन बनाएकोछ । नेपालका अभिषेक तिवारी २ र नरेन भट्ट १६ रनमा क्रिजमा छन् ।

नेपालले निरज कुमार यादवलाई ८ रनमै गुमाएको थियो । उनले थाईल्यान्डविरुद्ध ७ चौका र ६ छक्कासहित ७४ रनको उत्कृष्ट इनिङ खेलेका थिए । तीव्र गतिका बलर मोहम्मद अक्रमले उनलाई बोल्ड गरेका थिए ।

सूर्यांशु कोइराला २६ बलमा ५ चौकासहित २९ रनमा आउट भए । यी दुई ओपनरले थाईल्यान्डविरुद्ध १ सय १० रनको शतकीय साझेदारी गरेका थिए । तर घरेलु टोलीविरुद्ध धेरै समय क्रिजमा टिक्न सकेनन् ।

उनी हजिक हैकवालको बलमा बोल्ड भएका थिए । विकेटकिपर आषिश लुहार गोल्डेन डक आउट भए । तीव्र गतिका बलर आरिन अकिले प्रतिक भट्टाईलाई ४ रनमा क्याच आउट गराए ।

स्पिनर मोहम्मद मुकरीले दीपु कुमारलाई १५ रनमा क्याच गराए । उनले ४१ बल खेलेका थिए । मुकरीको बलमा स्वीप खेल्दा मिस हुँदा सन्तोष यादव शून्यमा एलबीडब्लू आउटको शिकार भएपछि नेपाल १८.३ ओभरमा ८०-६ को अवस्थामा पुगेको थियो । मलेसियाली ब्यारले घरेलु मैदान र कन्डिसनको भरपूर्ण फाइदा उठाएका छन् ।