एजेन्सी – ओपनर ब्रेन्डन किंगको शतकमा वेस्टइन्डिजले एकदिवसीय विश्वकप छनोटको सुपर सिक्स खेलमा ओमानमाथि ७ विकेटको सहज जित हात पारेको छ । विश्वकप दौडबाट बाहिरि सकेको वेस्टइन्डिजले सुपर सिक्समा पहिलो अंक बटुलेको हो ।

जितको लागि २ सय २२ रनको विजयी लक्ष्य पछ्याएको वेस्टइन्डिजले ३९.४ ओभरमा ३ विकेट गुमाउँदै पूरा गर्यो । वेस्टइन्डिजका ओपनर ब्रेन्डन किंगले १ सय ४ बलमा १५ चौकासहित १ सय रनको शतकीय इनिङ खेले । ओपनर जोनसन चाल्र्सलाई कलिमुल्लाहले ४ रनमै बोल्ड गरेका थिए ।

केसी कार्टी ४९ बलमा ३ चौकासहित २९ रनमा रन आउट भए । कप्तान शाई होप ६५ बलमा ४ चौका र २ छक्कासहित ६३ रनमा आउट भए । निकोलस पुरन १४ बलमा २ चौका र १ छक्कासहित १९ रनमा नट आउट रहे । ओमानका बिलाल खान र कलिमुल्लाहले समान एक विकेट लिए ।

त्यसअघि हरारे स्पोर्ट्स क्लबमा टस हारेर पहिला ब्याटिङको निम्तो पाएको ओमानले निर्धारित ५० ओभरमा ९ विकेट गुमाउँदै २ सय २१ रन बनाएको थियो । ओमानका सुरज कुमार ६५ बलमा ५ चौका र १ छक्कासहित ५३ रनमा अविजित रहे । सुरज नेपाली मुलका खेलाडी हुन् । सुरजको पुख्यौली घर बाग्लुङ हो ।

शोएब खान ५४ बलमा ५ चौका र १ छक्कासहित ५० रनमा रन आउट भए । मोहम्मद नदिम २०, आयन खान ३०, कप्तान अकिब इलियास १, जतिन्दर सिंह ८ र कश्याप प्रजापति ३१ रनमा आउट भए । वेस्टइन्डिजका रोमारियो शेफर्डले १० ओभरमा १ मेडनसहित ४४ रन खर्चेर ३ विकेट लिए । कायल मेयर्स ७ ओभरमा १ मेडनसहित ३१ रन खर्चेर २ विकेट लिए ।

ओमान सुपर सिक्समा जित विहीन हुँदै छैटौं स्थानमा रहेर बाहिरिएको छ । वेस्टइन्डिजले अन्तिम खेल शुक्रबार श्रीलंकासँग खेल्नेछ । श्रीलंका एक खेल अगावै विश्वकपमा पुगेको छ ।