एजेन्सी – नामिबियाका स्टार अलराउन्डर जेजे स्मितले ७ महिनापछि टोलीमा पूनरागमन गरेका छन् । घुँडामा चोटका कारण गत डिसेम्बरमा नेपालसँगको खेलपछि उनी टोली बाहिर भएका थिए ।

स्मितले बुधबार पहिलो टि२० आई खेलमा युगान्डाविरुद्ध खेलबाट सुरुवात गरेका हुन् । टोलीका स्टार अलराउन्डर स्मित नहुँदा नामिबियाले आइसिसी विश्वकप लिग २ मा नेपाल भ्रमणमा खराब प्रदर्शन गर्दै सोझै विश्वकप छनोटको अवसर गुमाएको थियो ।

गत वर्ष टि२० विश्वकपमा नामिबियाले श्रीलंकालाई हराउँदा स्मिथले ३१ रन बनाउनुको साथै एक विकेट लिँदै उत्कृष्ट प्रदर्शन गरेका थिए । स्मिथ एसोसिएट क्रिकेटकै एक उत्कृष्ट अलराउन्डरको रुपमा चिनिन्छन् ।

गत फेब्रुअरीमा नामिबिया नेपालसँग तीन र दुई विकेटले पराजित भएको थियो । पहिलो खेलमा २ सय ८५ र दोस्रो खेलमा २ सय ७४ रन बनाएपनि पराजित हुन पुगेको थियो ।

घरेलु मैदानमा भएको प्लेअफ क्वालिफायरमा नामिबिया शीर्ष दुईमा पर्न नसकेपछि विश्वकप छनोटको अवसर गुमाएको थियो । उनको आगमनले नामिबियाको तल्लोक्रम ब्याटिङ र तीव्र गतिको बलिङ उत्कृष्ट बन्नेछ । नामिबियाले युगान्डासँग चार टि२० आई र दुई एकदिवसीय अभ्यास खेल खेल्नेछ ।

आइसिसी विश्वकप लिग २ मा पछिल्ला ६ मध्य ५ खेलमा पराजित भएपछि नामिबियाले विश्वकप छनोटको अवसर गुमाएको थियो । नामिबिया विश्वकप छनोटमा पुग्न नसकेपनि टोलीलाई ब्यस्त राख्न अन्तर्राष्ट्रिय अभ्यास खेल खेल्दै आएको छ । यसअघि नामिबियाले भारतीय रणजी ट्रफी कर्नाटकसँग पाँच अभ्यास खेलको सिरिज खेलेको थियो ।