एजेन्सी – घरेलु टोली वेस्टइन्डिज भारतविरुद्ध पहिलो टेस्ट खेलको पहिलो दिननै निरिह बनेको छ । पहिलो दिनको खेल सकिँदा भारत २३ ओभरमा कुनै विकेट नगुमाई ८० रन बनाएको छ ।

भारतका लागि डेब्यू खेल खेलेका बायाँ हाते युवा ब्याटर यशस्वी जैसवाल ७३ बलमा ६ चौकासहित ४० रनमा अविजित छन् । कप्तान रोहित शर्मा ६५ बलमा ३ चौका र १ छक्कासहित ३० रनमा अविजित छन् ।

भारत पहिलो इनिङमा मात्रै ७० रनले पछिछ । भारतले जैसवाल र विकेटकिपर ईशान किशनलाई खेलमा डेब्यू दिएको थियो । जैसवालले ओपनिङ गर्ने भएपछि सुभमन गिलले तेस्रो नम्बरमा ब्याटिङ गर्नेछन् ।

त्यसअघि टस जितेर पहिला ब्याटिङ रोजेको वेस्टइन्डिज ६४.३ ओभरमा १ सय ५० रनमा अल आउट भयो । वेस्टइन्डिजका लागि एलिक एथानाजेले ९९ बलमा ६ चौका र १ छक्कासहित सर्वाधिक ४७ रन बनाए । अन्य कुनैपनि ब्याटरको प्रदर्शन सम्झन लायक रहेन ।

भारतका रविचन्द्रन आश्विनले पाँच विकेट लिए । रविन्द्र जडेजाले तीन, शार्दुल ठाकुर र मोहम्मद शिराजले समान एक विकेट लिए ।

वेस्टइन्डिजले घरेलु मैदानमा दुई टेस्ट, तीन ओडिआई र पाँच टि२० आई खेलको सिरिज भारतसँग खेल्नेछ । पहिलो पटक विश्वकपमा पुग्न नसकेको वेस्टइन्डिजको लागि यो सिरिज निकै महत्वपूर्ण हुनेछ ।