काठमाडौं (हाम्रो खेलकुद) – नेपालले एसिया कपमा डेब्यू गर्दै विश्व क्रिकेटका दुई पावर हाउस भारत र पाकिस्तानसँग खेल्दैछ । नेपाली क्रिकेट इतिहासमै पहिलो पटक भारत र पाकिस्तानसँग खेल्दा धेरैको कौतुहलता नेपालको प्रदर्शन कस्तो रहला भन्ने छ ।

नेपालले भदौ १३ मा पाकिस्तान र भदौ १८ मा भारतसँग खेल्नेछ । विश्व स्टारको बाहुल्यता भएको यी दुई देशको खेल विश्व क्रिकेटले हेर्नेछन् । विश्वकप अघि एसिया कप हुन लागेको हुँदा अझ बढी महत्वका साथ हेरिनेछ ।

एसोसिएट क्रिकेटमा राम्रो प्रभाव छाडेको नेपाली युवा टोली खेल विश्व हेर्न चाहन्छ । भारत र पाकिस्तानसँग खेल्ने हुँदा विश्वले नै नेपालको खेल हेर्ने देखिन्छ । भारत र पाकिस्तानलाई हराउन जादुमयी प्रदर्शन बाहेक अन्य असम्भव देखिन्छ । क्रिकेटमा कुनैपनि भर हुँदैन । खेलको दिन नेपाल कस्तो खेल खेल्छ त्यसमा भरपर्छ ।

हार वा जित खेलाडीको हातमा हुँदैन । तर नेपालले एसिया कपमा भारत र पाकिस्तानविरुद्ध राम्रो गर्न सके विश्व क्रिकेटमा थुप्रै अवसरका ढोकाहरु खुल्नेछन् । नेपाली टोली र खेलाडी दुवैको भाग्य परिवर्तन हुनसक्छ । त्यसको लागि नेपालले आफ्नो उत्कृष्ट क्रिकेट विश्वलाई देखाउनु पर्नेहुन्छ । एसिया कपमा राम्रो प्रदर्शन गर्न सके नेपाल र खेलाडीलाई हुने पाँच फाइदा यस प्रकार छन् ।

५. आत्माविश्वासमा वृद्धि

भारत र पाकिस्तानको टोलीमा विश्व स्टार छन् । नेपाली कुनै ब्याटरले पाकिस्तानका शाहिन शाह अफ्रिदी, हरिस रौफ र नसिम शाहको गतीमा रन बनाउन सक्छन् भने आगमी दिनमा आत्माविश्वास नै फरक हुन्छ ।

वर्तमान समयका विश्व क्रिकेटका उत्कृष्ट ब्याटर बाबर आजम र विराट कोहलीलाई कुनै नेपाली खेलाडीले आउट गर्छन् भने अन्य विश्व स्टारलाई पनि सकिन्छ भन्ने सोचको विकास हुन्छ । क्रिकेटमा आत्माविश्वास सधैं महत्वपूर्ण हुन्छ ।

बलियो आत्माविश्वास विना कुनैपनि खेलाडीले राम्रो गर्न सक्दैन । नेपाली खेलाडीमा उत्कृष्ट क्षमता भएपनि आत्माविश्वासको कमीको कारण ठूला टोलीविरुद्ध राम्रो गर्न सकेका छैनन् । एसिया कपमा भारत र पाकिस्तानसँग राम्रो गर्न सके नेपाली खेलाडीको आत्माविश्वासमा विकास हुनेछ ।

४. टेस्ट टोली नेपालसँग सिरिज खेल्न इच्छुक

यदि नेपालले भारत र पाकिस्तानविरुद्ध राम्रो गर्नसक्यो भने आगमी दिनमा टेस्ट टोलीहरु सिरिज खेल्न इच्छुक हुन सक्छन् । वर्तमान अवस्थामा टेस्ट टोली नेपालसँग सिरिज खेल्न खुलेर मानेका छैनन् । नेपालले सिरिज खेल्न प्रस्ताव गर्दा टेस्ट टोलीका क्रिकेट बोर्डहरु ए टोली पठाउने बताउँदै आएका छन् ।

एसिया कपको प्रदर्शनले आउने दिनमा बंगलादेश, श्रीलंका, अफगानिस्तान, जिम्बावे, वेस्टइन्डिज लगायतका टेस्ट टोलीहरु सिरिज खेल्न इच्छुक हुन्छन् । नेपाललाई हेर्ने दृष्टिकोण परिवर्तन हुनेछ । विश्व क्रिकेटमा नेपाली खेलाडी विस्तारै लोकप्रिय हुँदै जानेछन् । नेपाली समर्थक सामु टेस्ट टोली सिरिज खेल्न इच्छुक हुनसक्छन् ।

३. खेलाडीको क्षमतामा विकास

एसिया कपमा राम्रो गर्न सके नेपाली खेलाडीलाई विदेशी लिगमा अवसर आउनेछन् । विदेशी लिगमा स्टार खेलाडीहरुसँगै खेल्दा, ड्रेसिङरुम सेयर गर्दा र अभ्यास गर्दा खेलाडीको क्षमतामा पनि विकास हुनेछ । टेस्ट टोलीसँग सिरिज खेल्दा आफ्ना कमजोरी सुधार गर्दै जानेछन् ।

उदाहरणलाई कुनै नेपाली ब्याटरले जस बटलर, बेन स्टोक्स, डेविड मिलर, केन विलियम्सन जस्ता खेलाडीहरुसँग खेल्न पाएमा परिवर्तन गर्न सक्छन् । नेपाली कुनै बलरले ट्रेन्ट बोल्ट, कागिसो रबाडा, मिचेल स्टार्क, प्याट कमिन्स, शाहिन अफ्रिदी जस्ता खेलाडीसँगै खेल्न पाएमा धेरै कुराहरु सुधार गर्न सक्छन् ।

उनीहरुबाट धेरै कुराहरु सोधपुछका साथ सिक्न सक्छन् । स्टार खेलाडीको एउटा शब्द वा सेकेन्डको भनाईले खेलाडीको पुरै करिअर फेरिन सक्छ ।

२. आर्थिक स्तरमा वृद्धि

लगातार सिरिज र विदेशी लिग खेल्न पाएमा नेपाली खेलाडीको आर्थिक अवस्थामा वृद्धि हुनेछ । फ्रेन्चाइज लिगहरु राम्रो रकममा अनुबन्ध गर्न सक्छन् । अर्कोतर्फ ठूला टोलीहरुले सिरिज खेल्न चाहेमा टोली झन् ब्यस्त बन्नेछ । म्याच फी र दैनिक भत्ता लगायतले खेलाडीको आर्थिक अवस्थामा पनि सुधार हुनेछ ।

१. आइपिएलसहित फ्रेन्चाइज लिगमा अवसर

भारत र पाकिस्तानमा विश्वका प्रमुख बलर र ब्याटर छन् । ती टोलीविरुद्ध कुनैपनि नेपाली खेलाडीले राम्रो प्रदर्शन गर्छन् भने इन्डियन प्रिमियर लिग (आइपिएल) सहित विश्वका फ्रेन्चाइज लिग खेल्ने अवसरको ढोकाहरु खोल्नेछन् । आइपिएल खेल्ने नेपाल मात्रै नभएर विश्व क्रिकेटरको सपना हुने गर्दछ ।

विश्वका सबै चर्चित फ्रेन्चाइज टोलीका मालिक, कप्तान र प्रशिक्षकले भारत र पाकिस्तानविरुद्ध नेपाली खेलाडीहरुको प्रदर्शन हेर्नेछन् । राम्रो प्रदर्शन गर्दै मन जित्न सके आगमी दिनमा नेपाली खेलाडीलाई किन्न सक्छन् ।

युवा खेलाडी हुँदा सिक्न बाँकी छ । कुनै टेस्ट टोलीका खेलाडी घाइते भएमा, आफ्नो देशको खेल भएर उपलब्ध नभएमा वा कम पैसामा किन्नु परे नेपाली खेलाडी रोजाईमा पर्न सक्छन् ।