काठमाडौं (हाम्रो खेलकुद) – वर्तमान विश्व ओडिआई क्रिकेटका नम्बर वान ब्याटर बाबर आजमले एसिया कपमा नेपालविरुद्ध विश्व कीर्तिमानी शतक हानेका छन् । बाबरले १ सय ९ बलमा आफ्नो ओडिआई करिअरको १९ औं शतक पूरा गरेका हुन् ।

बाबर आजम १ सय ११ बलमा १० चौकासहित १ सय २ रनमा क्रिजमा छन् । योसँगै बाबर ओडिआईमा सर्वाधिक छिटो १ सय २ इनिङमा १९ औं शतक प्रहार गर्ने ब्याटर बनेका छन् । बाबरले दक्षिण अफ्रिकाका पूर्व ब्याटर हासिम अमलाको १ सय ४ र भारतका विराट कोहलीले १ सय २४ इनिङमा १९ औं शतक हानेका थिए ।

मुल्तान क्रिकेट रंगशालामा टस जितेर पहिला ब्याटिङ रोजेको पाकिस्तानले ४२ ओभरमा ४ विकेट गुमाउँदै २ सय २९ रन बनाएको छ ।

करणले बाबर आजमको ५५ रनमा क्याच छाड्न पुगेका थिए । २९ औं ओभरको पाँचौं बलमा करण बाबरलाई कट एण्ड बोल्ड आउट गराउनबाट चुकेका थिए । बाबरले त्यसको फाइदा उठाउँदै शतक हानेका छन् । इफ्तिखार अहमद ५१ रनमा अविजित छन् । पाँचौं विकेटका लागि बाबर र इफ्तिखारले शतकीय साझेदारी गरि सकेका छन् ।

एक समय ६.१ ओभरमा २५–२ को अवस्थामा पुगेको पाकिस्तानलाई तेस्रो विकेटका लागि रिजवान र बाबरले १ सय ६ बलमा ८६ रनको साझेदारी गर्दै खेलमा फर्काएका थिए ।

नेपालले सुरुवात भने राम्रो गरेको थियो । तीव्र गतिका बलर करण केसीले छैटौं ओभरको तेस्रो बलमा ओपनर फखार जमानलाई विकेटकिपर आसिफ शेखबाट १४ रनमा क्याच गराएका थिए ।

सातौं ओभरको पहिलो बलमा रोहित पौडेलले डाइरेक्ट थ्रोमा अर्का ओपनर इमाम उल हकलाई ५ रनमा रन आउट गरेका थिए । त्यसअघि आरिफ शेखले पाँचौं ओभरको पाँचौं बलमा इमाम उल हकलाई ब्यक्तिगत पाँच रनमा जीवनदान दिएका थिए । तर उक्त जीवनदानको उनले फाइदा उठाउन सकेनन् ।

विकेटकिपर मोहम्मद रिजवान २४ औं ओभरको चौथो बलमा ५० बलमा ६ चौकासहित ४४ रनमा रन आउट भए । दीपेन्द्रको डाइरेक्ट थ्रो बलमा रिजवान रन आउट हुन पुगेका थिए । अघा सलमान ५ रनमा क्याच आउट भएका थिए ।