काठमाडौं (हाम्रो खेलकुद) – नेपालले एसिया कपमा आज भारतसँग खेल्दैछ । खेल नेपाली समय अनुसार दिउँसो ३ ः १५ मा श्रीलंकाको कान्डीमा रहेको पालेकेले इन्टरनेशल क्रिकेट स्टेडियममा सुरुहुनेछ । नेपाल पहिलो खेलमा पाकिस्तानसँग २ सय ३८ रनले पराजित भएको थियो ।

नेपालले भारतविरुद्धको खेलमा टोलीमा परिवर्तन गर्ने सम्भावना कम छ । नेपालले स्पिनर ललितनारायण राजवंशीको स्थानमा कुनै एक खेलाडीलाई मौका दिनसक्छ । तर पालेकेलेको मैदान स्पिनर सहयोगी मानिन्छ । त्यसैले ललितलाई नै निरन्तरता दिने देखिन्छ ।

यदि पिच स्पिनर सहयोगी नभएको खण्डमा मात्रै भीम सार्की र प्रतिश जि.सी मध्य एकलाई मौका दिने सम्भावना रहन्छ । भारतीय खेलाडीको बायाँ हाते बलरविरुद्ध राम्रो इतिहास छैन । पाकिस्तानका तीव्र गतिका बलर शाहिन शाह अफ्रिदीले भारतविरुद्ध चार विकेट लिएका थिए ।

अन्य खेलाडी नेपालले परिवर्तन गर्ने सम्भावना देखिदैन । अ‍ोपनरमा कुशल भुर्तेल र आसिफ शेख नै हुनेछन् । यी दुई ओपनरबाट नेपाल राम्रो सुरुवात चाहन्छ । कप्तान रोहित पौडेल तेस्रो नम्बरमा खेल्नेछन् । रोहितको प्रदर्शन निकै महत्वपूर्ण हुनेछ । चौथो नम्बरमा आरिफ शेख खेल्ने सम्भावना छ । त्यसपछि नेपालको अवस्थामा भरपर्छ ।

नेपालले दुई युवा अलराउन्डर गुलशन झा र कुशल मल्ल दुबैलाई निरन्तरता दिनेछ । यी दुई खेलाडीलाई राम्रो प्रदर्शन गर्दै आइपिएल जस्ता लिग खेल्ने ढोका खोल्ने अवसर हुनेछ । दीपेन्द्रसिंह ऐरी नेपालका प्रमुख अलराउन्डरको रुपमा खेल्नेछन् । दीपेन्द्र ब्याटिङ, बलिङ र फिल्डिङ तीनै क्षेत्रमा राम्रो गर्दै आएका छन् ।

यता सोमपाल कामी, करण केसी तीव्र गतिका हतियार हुन् । सन्दीप लामिछाने र ललितले स्पिन आक्रामण सम्हाल्नेछन् । पार्टटाइम स्पिनरमा कुशल मल्ल, दीपेन्द्रसिंह ऐरी, कुशल भुर्तेल र रोहित पौडेल हुनेछन् ।

तीव्र गतिका पार्टटाइम बलरमा गुलशन र आरिफ शेख हुनेछन् । पाकिस्तानसँगको खेलबाट नेपालको टोलीमा परिवर्तनको सम्भावना कम देखिन्छ ।

नेपालको सम्भावित प्लेइङ ११ :

आसिफ शेख (विकेटकिपर),कुशल भुर्तेल, रोहित पौडेल (कप्तान), आरिफ शेख, दीपेन्द्रसिंह ऐरी, कुशल मल्ल, गुलशन झा, सोमपाल कामी, करण केसी, सन्दीप लामिछाने र ललितनारायण राजवंशी ।