एजेन्सी – आइसिसी विश्वकप २०२३ मा शनिबार भारत र पाकिस्तानबीच प्रतिस्पर्धा हुँदैछ । खेल नेपाली समय अनुसार दिउँसो २ : १५ मा नरेन्द्र मोदी स्टेडियम अहमदाबादमा सुरु हुनेछ । दुबै टोली सुरुवाती दुई खेलमा विजयी भएका छन् । भारतले अष्ट्रेलियालाई ६ विकेट र अफगानिस्तानलाई ८ विकेटले हराएको थियो ।

पाकिस्तानले नेदरल्यान्ड्सलाई ८१ रन र श्रीलंकालाई ६ विकेटले हराएको थियो । भारतको रोहित शर्मा र पाकिस्तानको बाबर आजमले कप्तानी गर्नेछन् । पाकिस्तानले पछिल्लो खेलमा श्रीलंकालाई हराउन ३ सय ४५ रनको विशाल लक्ष्य पूरा गरेको हुँदा मनोबल उच्च छ । भारत आफ्नो उच्च लयसँगै घरेलु मैदान र दर्शकको फाइदा उठाउँदै जित हात पार्न चाहन्छ ।

भारतले एकदिवसीय विश्वकप इतिहासमा पाकिस्तानसँग हालसम्म हारेको छैन । यी दुई देशबीच विश्वकपमा ७ खेल भएका छन् । जसमा ७ खेलमा नै भारत विजयी भएको छ । भारत विश्वकपमा अपराजित यात्रा कायमै राख्न खोज्नेछ । पाकिस्तान विश्वकपमा भारतलाई पहिलो पटक हराउन चाहन्छ ।

पाकिस्तानले टि२० विश्वकपमा भने भारतलाई हराएको छ । २०२१ को टि२० विश्वकपमा पाकिस्तानले भारतलाई १० विकेटले हराएको थियो । टि२० विश्वकपमा यी दुई देशबीच ७ खेल हुँदा भारत ६ र पाकिस्तान १ खेलमा विजयी भएको छ ।
भारत र पाकिस्तानबीच एकदिवसीय विश्वकपको हेड टु हेड यस प्रकार छ ।

१९९२ – भारत ४३ रनले विजयी

१९९६ – भारत ३९ रनले विजयी

१९९९ – भारत ४७ रनले विजयी

२००३ – भारत ६ विकेटले विजयी

२०११ – भारत २९ रनले विजयी

२०१५ – भारत ७६ रनले विजयी

२०१९ – भारत डकवर्थ लेविस पद्धतिको आधारमा ८९ रनले विजयी ।