काठमाडौं (हाम्रो खेलकुद) – नेपाली सिनियर राष्ट्रिय क्रिकेट टोलीले त्रिकोणात्मक टि२०आई सिरिजको अन्तिम लिग खेलमा यूएईबाट १ सय ६५ रनको प्रतिस्पर्धात्मक लक्ष्य प्राप्त गरेको छ ।

नेपालले टस जितेर पहिलो ब्याटिङको निम्तो दिएपछि यूएईले २० ओभरमा ७ विकेट गुमाउँदै १ सय ६४ रन जोड्यो । यूएईका लागि बसिल हमिद र वृत्य अरविन्दले ४५-४५ रनको योगदान दिए ।

बसिलले १९ बलमा २ चौका र ५ छक्का प्रहार गरेका थिए । इनिङको अन्त्यतिर उनको आक्रामक ब्याटिङकै कारण यूएईले राम्रो योगफल खडा गरेको थियो । त्यसअघि वृत्यले मध्यक्रम सम्हाल्ने क्रममा ५१ बलमा ४ चौका प्रहार गरे ।

सोमपालले पहिलो स्पेलको सुरुवाती दुई ओभरमा विकेट लिँदै यूएईका दुई ओपनरलाई पेभेलियन फर्काएका थिए । उनले पहिलो ओभरको अन्तिम बलमा खालिद शाहलाई बोल्ड गरे । त्यसअघि खालिदले सोमपाललाई तीन चौका प्रहार गरेका थिए ।

सोमपालले आफ्नो दोस्रो ओभरको चौथो बलमा कप्तान मुहमद वासिमलाई पनि आउट गरे । वासिम ठूलो सट खेल्ने धुनमा दिप मिड विकेटमा क्याच आउट भए । उनले ७ बलमा १ चौकासहित ८ रन जोडे ।

आसिफ खान १७ बलमा १८ रन जोड्दै गुलशन झाको शिकार बने । आलिशान शरफु र वृत्यले त्यसपछि इनिङ सम्हाल्ने कोशिश गरेपनि रन कुद्ने क्रममा असमझदारी भएपछि आलिशान रनआउट भए ।

नेपालका लागि सोमपाल र अभिनाशले २-२ विकेट लिए । करण केसी र गुलशनको नाममा १-१ विकेट रह्यो ।

नेपालका कप्तान रोहितकुमार पौडेलले लगातार चौथो खेलमा टस जितेर पहिलो फिल्डीङ गर्ने निर्णय लिएका थिए । नेपाल समूहको ३ खेल जित्दै फाइनलमा प्रवेश गरिसकेको छ । यूएईले आजको खेलमा जित हासिल गरे फाइनल प्रवेश गर्नेछ ।

नेपालले आजको खेलमा दुई परिवर्तन गरेको छ । विवेक यादव र अभिनाश बोहोरा टोलीमा फर्केका छन् । यस्तै पछिल्लो खेलबाट प्रतिश जिसी र ललित नारायण राजवंशीलाई विश्राम दिइएको छ ।

नेपालले सुरुवाती दुई खेलमा पनि टस जितेर फिल्डीङ नै रोजेको थियो । हङकङसँग शनिबार भएको खेलमा भने नेपालले पहिलो ब्याटिङ गर्दै २ सय १३ रनको विशाल योगफल खडा गरेको थियो ।

नेपालको टोली :

आसिफ शेख, कुशल भुर्तेल, कुशल मल्ल, रोहित पौडेल, दीपेन्द्रसिंह ऐरी, सन्दीप जोरा, विवेक यादव, सोमपाल कामी, गुलशन झा, करण केसी, अभिनाश बोहोरा

यूएईको टोली :

मुहमद वसीम, वृत्य अरविन्द, खालिद शाह, आलिशान सराफु, आसिफ खान, बसिल हमिद, नसिर अली, निलांश केश्वनी, जहुर खान, मुहमद जवादुल्लाह, अकिफ राजा