काठमाडौं (हाम्रो खेलकुद) – नेपालले आइसिसी टि२० विश्वकप एसिया क्षेत्र फाइनलमा ओमानसँग सुपर ओभरमा हार्न पुग्यो । ओमानले घरेलु टोली नेपाललाई समूह चरण र फाइनल दुबैमा हराउँदै उपाधिका साथ फर्कियो । घरेलु मैदान र हजरौं दर्शकको साथमा नेपालले टस जितेर राम्रो ब्याटिङ गरेको थियो ।

सुरुवात कमजोर रहे पनि नेपालले राम्रो अन्त्य गर्दै २० ओभरमा ६ विकेटको क्षतिमा १ सय ८४ रन बनाएको थियो ।
गुलशन झाले २५ बलमा ५ चौका र ४ छक्कासहित सर्वाधिक ५४ रन बनाए । रोहित पौडेलले ३७ बलमा ५ चौका र २ छक्कासहित ५२ रनमा अविजित रहे ।

नेपालले पहिला ब्याटिङ गर्दा उक्त रन जितको लागि पर्याप्त हुने अनुमान गरिएको थियो । एक समय ओमानले उक्त लक्ष्य सहजै पूरा गर्ने अनुमान गरेको थियो । तर अन्त्य तिर लगातार विकेट गुमाउँदा सुपर ओभरमा पुगेको थियो । अन्तिम ६ बलमा ८ रन चाहिँदा सन्दीपले एक रन आउटसहित तीन विकेट लिएपछि खेल सुपर ओभरमा धकेलिएको थियो ।

सुपर ओभर अझ रोमान्चक हुने अनुमान गरिएको थियो । तर ओमानले सुपर ओभरमा भने एकपक्षीय जित हात पार्यो । नेपाल विश्वकपमा पुगि सकेको हुँदा यो खेल उपाधि भिडन्तको लागि मात्रै थियो । नेपालले ओमानसँग फाइनलमा हार्नुका प्रमुख पाँच कारण यस प्रकार छन् ।

५. कमजोर बलिङ आक्रामक

विकेट (पिच) जस्तो भएपनि टि२० क्रिकेटमा १ सय ८४ रन रोक्न सक्नुपर्छ । त्यसको लागि बलरले राम्रो गर्नुपर्छ । फाइनल खेल र स्कोर बोर्डको दबाबले यो ओमानलाई २ सय रन पूरा गर्नु बराबर थियो । तर नेपालको बलिङ आक्रामण कमजोर रह्यो । त्यहिँ कमजोर बलिङका कारण नेपालले हार्न पुग्यो ।

नेपालले पहिलो ओभर सोमपाल कामीलाई दिएको थियो । दोस्रो ओभरमा कुशल मल्ललाई लगाएको थियो । पार्टटाइम बलर दोस्रो ओभरमै लगाउनु कुनैपनि टोलीको लागि राम्रो कुरा होईन । पार्टटाइम बलर विकेट भन्दा पनि रन रोक्न वा ओभर सक्नलाई प्रयोग गरिन्छ ।

कुनैपनि नेपाली बलरले ओमानका ब्याटरलाई दबाबमा राख्न सकेनन् । नेपालका प्रमुख बलर सन्दीप लामिछानेलाई पनि ओमानी ब्याटरले सहजै रन जोडेका थिए । प्रतियोगिता भर एक बल पनि नगरेका विवेक यादवलाई समेत बलिङमा ल्याएको थियो ।

नेपालका प्रमुख दुई बलर सोमपाल कामीको इकोनमी १२.३३ र करण केसीको १५.०० थियो । सन्दीप र अभिनाश दुबैले समान ४ ओभरमा ३० रन खर्चेका थिए । सन्दीप अन्तिम ओभरमा दुई विकेट लिएका थिए ।

नेपालले ७ बलर प्रयोग गरेको थियो । तर कुनैपनि बलर हाबी हुनसकेनन् । त्यसैको कारण ओमानका ब्याटरले खुलेर रन बनाएका थिए । कमजोर बलिङ आक्रामण नेपालको हारको एक कारण थियो ।

४.सुपर ओभरमा अभिनाशले योर्करको धुनमा फुलटस गर्नु

अभिनाश नेपालका डेथ ओभर स्पेलिष्ट बलर हुन् । खेल टाई भएपछि नेपाललाई जित्ने राम्रो अवसर थियो । स्पिनर सन्दीप लामिछानेले अन्तिम ६ बलमा ७ रन दिँदै खेल सुपर ओभरमा पुर्याएका थिए । नेपालले सन्दीपलाई सुपर ओभर दिन सक्थ्यो ।

तर अभिनाशलाई नै विश्वास गर्यो । किनभने अभिनाश टोलीमा भएका बलरमा योर्करका लागि भरपर्दा खेलाडी हुन् ।
तर अभिनाशले त्यो दबाबमा आफुलाई सम्हाल्न भने सकेनन् । उनलाई नसिम खुशीले तीन छक्का हानेपछि सुपर ओभरमा ओमानले २१ रन बनाएको थियो । अभिनाशले तीनै छक्का फुलटस बलमा खान पुगेका थिए ।

अभिनाशले पहिलो बलमा अकिबलाई एक रन दिएका थिए । तर दोस्रो फुलटस बललाई नसिम खुशीले डिप मिडविकेटमा उत्कृष्ट छक्का हाने । हाइटको नो बल देखिए पनि अम्पायरले दिएनन् । तेस्रो बल खुशीले वाइडको धुनमा छाडेका थिए र त्यो डट भयो ।

सुरुवाती तीन बलमा ओमानले ७ रन बटुलेको थियो । तर चौथो पुन फुलटस बल गरे । त्यो फुलटस बललाई खुशीले छक्का हानेका थिए । लगत्तै वाइडपछि अर्को फुलटस बललाई खुशीले काउकर्नरमा छक्का प्रहार गरेपछि जित लगभग टाढा भएको थियो ।

सुपर ओभरमा फुलटस बल नै घातक बनेको थियो । अभिनाशले योर्करको धुनमा फुलटस फाल्न पुगेका थिए । नसिम खुशीले भरपूर्ण फाइदा उठाए । सुपर ओभरमा २२ रन बनाउन कुनैपनि टोलीलाई कठिन पर्ने देखिन्छ । उता ओमानका बिलाल खानले सुपर ओभरमा लगातार योर्कर फ्ँयालेका थिए । सुपर ओभरमा अभिनाश दबाब सम्हाल्न सकेको भए सायद नतिजा अर्कै हुनसक्थ्यो ।

३. प्रजापति र अकिबको साझेदारी तोड्न नसक्नु

लक्ष्य जति सुकै विशाल भएपनि अर्को टोली त्यो पूरा गर्न नै मैदान उत्रर्ने गर्दछ । विकेट नगुमेको खण्डमा अर्को टोलीले उक्त लक्ष्य पूरा गर्नसक्छ । ओमानले नेपालविरुद्ध सानदार सुरुवात गरेको थियो । ओमानले सुरुवाती १० ओभरमा मात्रै २ विकेट गुमाउँदै ९७ रन बनाएको थियो ।

ओमानलाई बाँकी ६० बलमा ८७ रन जितको लागि चाहिँएको थियो । ओमानको हातमा ८ विकेट थियो । प्रतिओभरमा ओमानलाई झन्डै ९ रन बनाउनु पर्ने हुन्थ्यो ।

टि२० मा प्रतिओभरमा ९ रन कुनै कठिन मानिदैन । नेपाली बलरले सुरुवातमा विकेट लिन नसक्नु नै हारको एक कारण हो । सुरुवातीमा विकेट लिन सकेको भए ओमान दबाबमा पर्ने थियो ।

दोस्रो विकेटका लागि अकिब इल्यास र कश्याप प्रजापतिले ४० बलमा ६७ रनको साझेदारी गरेका थिए । त्यो साझेदारी नै ओमानको जितको एक प्रमुख टर्निङ प्वाइन्ट थियो । अकिब दशौं ओभरको चौथो बलमा आउट भएका थिए । अकिब आउट हुनुअघि ओमान ९.३ ओभरमा ९४-१ को बलियो अवस्थामा थियो ।

अकिबले १९ बलमा २ चौका र ३ छक्कासहित ३३ रन जोडेका थिए । कश्यापले ५२ बलमा ३ चौका र ४ छक्कासहित ६३ रन बनाउँदै कुनैपनि समय नेपाललाई खेलमा हाबी हुन दिएनन् । निरन्तर कश्यापले दबाबमा राखेका थिए ।

ओमानले १५.१ ओभरमा १३६-२ को अवस्थामा हुँदै दबाब नेपाललाई राखेको थियो । ठूलो सर्टको धुनमा अन्तिममा विकेट गुमाएपछि खेल सुपर ओभरमा पुगेको थियो । सुरुवातमा विकेट लिन नसक्नु हारको कारण हो ।

२.जिशानको उत्कृष्ट कप्तानी र ओमानको टिम होमवर्क

नेपाललाई हराउन ओमानको टिम होमवर्क र जिशानको कप्तानी पनि उत्कृष्ट रह्यो । नसिम खुशी इनिङमा एक रनमै आउट भएका थिए । तर सुपर ओभरमा उनले आफ्ना खेलाडीलाई विश्वास गरे । खुशीले तीन छक्का हान्दै सुपर ओभरमा सहज जितको आधार तय गराए ।

जिशानको नेपाली ब्याटरविरुद्ध बलिङ र फिल्डिङ सजावत झनै उत्कृष्ट थियो । कुशल भुर्तेललाई आउट गर्न डीप स्क्वायर लेगमा मेहरान खान राखेका थिए । अकिबले लेग साइडको बलमा कुशल भुर्तेललाई त्यहिँ क्याच आउट गराए । कुशल मल्ल अफ स्टिम बल खेल्न संघर्ष गर्छन् । त्यहिँ अफ स्टम्पमा अकिबले कुशललाई बोल्ड गरेका थिए ।

ब्याटिङमा पनि मोहम्मद नदिमलाई तल्लोक्रममा खेलाएका थिए । फिनिसरको लागि अनुभवी अलराउन्डर राखेका थिए । नदिमले ९ बलमा ५ चौकासहित २४ रन बनाएका थिए । नदिम अघि मेहरान खानलाई पठाएका थिए । खानले ३ बलमा १ चौका र १ छक्कासहित १० रन जोडेका थिए । अन्तिम समयमा त्यो १० रन ओमानको लागि निकै महत्वपूर्ण सावित भएको थियो ।

१.सुरुवाती १० ओभरमा नेपालको कमजोर ब्याटिङ

टियुको पिचमा रन बनाउन ब्याटरलाई सहज हुन्छ । ब्याटिङ सहयोगी पिचमा १७०/८० रन सुरक्षित मानिदैन । २०२१ मा टि२० आई खेलमा टियुमा नेदरल्यान्ड्सले नेपालविरुद्ध २ सय ६ रनको सहज रन पूरा गरेको थियो । मलेसियाले नै नेपालविरुद्ध १ सय ६५ रन बनाएको थियो ।

नेपालले टस जितेर रोजेको ब्याटिङ थियो । पहिला ब्याटिङ रोज्नुले विशाल लक्ष्य बनाउने सोच स्पष्ट देखिन्छ । तर सुरुवात नेपालको राम्रो हुन सकेन । सुरुवाती ६० बलमा नेपालले ६० रन बनाउदा प्रमुख चार ब्याटर गुमाएको थियो । नेपालले अन्तिम ७ ओभरमा १ सय १८ रन जोड्दै राम्रो योगफल तयार पारेको थियो ।

तर टियुको उक्त पिचमा ओमानले एक समय सहज पूरा गर्ने देखिएको थियो । तर अन्तिम ओभरमा सन्दीपले एक रन आउटससहित दुई विकेट लिँदै ७ रन खर्चेपछि खेल सुपर ओभरमा पुगेको थियो ।

नेपालको अन्तिम ७ ओभरले नै ब्याटिङ गर्न कति सहज थियो अनुमान लगाउन सकिन्छ । सुरुवाती १० ओभर अर्थात ६० बलमा गरेको कमजोर प्रदर्शन नेपालको हारको प्रमुख कारण हो ।