एजेन्सी – भारतमा जारी आइसिसी विश्वकप २०२३ को दोस्रो सेमिफाइनल खेलमा अष्ट्रेलिया र दक्षिण अफ्रिका भिड्ने पक्का भएको छ । अंक तालिकामा दोस्रो र तेस्रो स्थानमा रहने पक्का भएपछि सेमिफाइनल भिडन्त पनि पक्का भएको हो ।

यी दुई देशबीच १६ नोभेम्बरमा इर्डेन गार्डेन कोलकातामा सेमिफाइनल हुनेछ । दक्षिण अफ्रिका ८ खेलमा ६ मा जित र २ मा हारसहित १२ अंकका साथ दोस्रो स्थानमा छ ।

दक्षिण अफ्रिकाले अन्तिम खेल अफगानिस्तानसँग खेल्नेछ । अष्ट्रेलिया ८ खेलमा ६ मा जित र २ मा हारसहित तेस्रो स्थानमा छ । अष्ट्रेलियाले अन्तिम खेल बंगलादेशसँग खेल्नेछ ।

अन्तिम चारमा रहने एक टोली १० अंकका साथ सेमिफाइनल खेल्ने पक्का भएको छ । त्यसैको कारण अष्ट्रेलिया र दक्षिण अफ्रिकाबीच सेमिफाइनल भिडन्त पक्का भएको हो । उता भारत ८ खेलमा १६ अंकका साथ शीर्षस्थानमा छ ।

भारतले चौथो स्थानको टोलीसँग वानखडे स्टेडियम मुम्बईमा १५ नोभेम्बरमा सेमिफाइनल खेल्नेछ । चौथो स्थानमा रहँदै सेमिफाइनल खेल्न प्रतिस्पर्धामा न्युजिल्यान्ड, अफगानिस्तान र पाकिस्तान छन् ।

समान ८ खेलमा न्युजिल्यान्ड, पाकिस्तान र अफगानिस्तानको ८–८ अंक छ । नेटरनरेटको कारण न्युजिल्यान्ड चौथो, पाकिस्तान पाँचौं र अफगानिस्तान छैटौं स्थानमा छन् । न्युजिल्यान्डको नेटनरेट ०.३९८, पाकिस्तानको ०–०३६ र अफगानिस्तानको माइनस ०.३३८ छ ।

न्युजिल्यान्डले अन्तिम खेल बिहीबार श्रीलंकासँग खेल्नेछ । पाकिस्तानले अन्तिम खेल शनिबार इंग्ल्यान्डसँग खेल्नेछ । अफगानिस्तानले अन्तिम खेल शुक्रबार दक्षिण अफ्रिकासँग खेल्नेछ ।

यी तीन टोलीमा १० अंकमा पुग्ने र नेटरनरेटमा माथि रहने टोली शीर्ष चारमा रहँदै सेमिफाइनल खेल्नेछ । फाइनल भने १९ नोभेम्बरमा अहमदाबादमा हुनेछ ।