एजेन्सी – स्टार अलराउन्डर हार्दिक पान्ड्या इन्डियन प्रिमियर लिग (आइपिएल) मा मुम्बई इन्डियन्सको नयाँ कप्तानमा नियुक्त भएका छन् । रोहित शर्मा अव खेलाडीको रुपमा मात्रै आइपिएल खेल्ने भएका छन् ।

रोहित २०१३ देखी २०२३ सम्म मुम्बईको कप्तानी गरेका थिए । रोहितको कप्तानीमा मुम्बईले पाँच पटक (२०१३, २०१५, २०१७, २०१९ र २०२० ) मा उपाधि जितेको थियो । चेन्नई सुपर किंग्सका महेन्द्र सिंह धोनीले पनि पाँच उपाधि जिताएका छन् ।

हार्दिकले २०१५ मा मुम्बईको लागि डेब्यू गरेका थिए । मुम्बईलाई चार उपाधि दिलाउन हार्दिकको महत्वपूर्ण भूमिका थियो । २०२२ को मेघा अक्सनमा मुम्बईले सबैलाई आश्चर्य पार्दै हार्दिकलाई टोलीबाट फुकुवा गरेको थियो ।

२०२२ मा गुजरात टाइटन्सबाट कप्तानी गर्दै टोलीलाई च्याम्पियन बनाएका थिए । गत वर्ष उनको कप्तानीमा गुजरात फाइनलमा चेन्नईमा पराजित भएको थियो । दुई सिजन गुजरातमा बसेपछि पुन आफ्नो पुरानो टोलीमा फर्किका हुन् ।

२०१५ को अक्सनमा मुम्बईले हार्दिकलाई १० लाख भारुमा किनेको थियो । उनी १५ करोड भारुमा २०२२ मा गुजरातमा गएका थिए । मुम्बईमा पनि उनले १५ करोड भारुनै पाउनेछन् । आइपिएल अक्सन आगामी डिसेम्बर १९ मा दुबईमा हुँदैछ । यस पटकको अक्सन निकै महत्वपूर्ण हुनेछ । पछिल्ला तीन सिजनमा भने मुम्बईले राम्रो प्रदर्शन गर्न सकेको छैन ।