काठमाडौं (हाम्रो खेलकुद) – चेन्नई सुपर किंग्सले न्युजिल्यान्डका स्टार अलराउन्डर डर्याल मिचेललाई इन्डियन प्रिमियर लिग(आइपिएल) २०२४ को अक्सनमा १४ करोड भारु( २२ करोड नेपाली रुपैयाँ) मा किनेको छ । अक्सनमा चेन्नई, दिल्ली र पन्जाबबीच प्रतिस्पर्धा भएको थियो ।

न्युजिल्यान्डका स्टार अलराउन्डर डर्याल मिचेलले अक्सनमा १ करोड भारु राखेका थिए । उनलाई किन्न दिल्ली र पन्जाबबीच अक्सनमा कडा प्रतिस्पर्धा भएको थियो । दिल्लीले ११ करोड ५० लाख भारुपछि मूल्य लगाउन छाडेको थियो । तर १२ करोडमा आएर चेन्नईले मूल्य लगाएपछि थप रोचक बनेको थियो । अन्तिममा चेन्नईले नै किनेको थियो ।

चेन्नईले यसअघि न्युजिल्यान्डका अलराउन्डर रचिन रविन्द्रलाई १ करोड ८० लाख भारुमा किनेको थियो । भारतीय तीव्र गतिका बलर हर्षल पटेल ११ करोड ७५ लाख भारु (झन्डै १९ करोड नेपाली रुपैयाँ) मा पन्जाब किंग्स पुगेका छन् ।

सनराइजर्स हैदराबादले प्याट कमिन्सलाई आइपिएल इतिहासकै सर्वाधिक मूल्य २० करोड ५० लाख भारु( झन्डै ३३ करोड) नेपाली रुपैयाँमा किनेको छ ।
यो आइपिएल अक्सनमा पाएको सर्वाधिक मूल्य हो । यसअघि गतवर्ष पन्जाब किंग्सले साम करनलाई १८ करोड ५० लाख भारुमा किनेको थियो ।