काठमाडौं (हाम्रो खेलकुद) – बागमती प्रदेशले प्रधाममन्त्री कप महिला टि२० राष्ट्रिय प्रतियोगितामा मधेश प्रदेशलाई २८ रनले हराउँदै विजयी सुरुवात गरेको छ । जितको लागि १ सय १८ रनको बलियो विजयी लक्ष्य पछ्याएको मधेशले निर्धारित २० ओभरमा ५ विकेट गुमाउँदै ८९ रन बनायो ।

मधेशको लागि पुजा महतोले ४५ बलमा ४ चौकासहित ३५ रन बनाइन् । ओपनर अनुराधा चौधरी २८ बलमा ३ चौकासहित २१, एलिसा यादव ४, साना प्रविन शून्य, प्रतिमा शाह १४, सरस्वती कुमारी चौधरी २ र रोजी कडारी ५ रन बनाइन् ।

बागमतीकी अश्मिना कर्माचार्यले ४ ओभरमा १८ रन खर्चेर २ विकेट लिइन् । मनिषा उपाध्यायले ४ ओभरमा १२ रन खर्चेर १ विकेट लिइन् ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको बागमती प्रदेशले निर्धारित २० ओभरमा ४ विकेट गुमाउँदै १ सय १७ रन बनाएको थियो ।

बागमतीको जितमा मध्यक्रमकी ब्याटर एसोदा विष्टले ३९ बलमा ६ चौकासहित ४७ रनको अविजित इनिङ खेलिन् । अश्मिना कर्माचार्य ३१ बलमा ३ चौकासहित ३० रनमा अविजित रहिन् ।

एक समय १०.३ ओभरमा ४५–४ को अवस्थामा पुगेको बागमतीलाई पाँचौं विकेटको लागि अश्मिना र यसोदाले ७२ रनको अविजित साझेदारी गर्दै बलियो योगफलको आधार तय गरेका थिए ।

ओपनर हेलिसा गुरुङ १२, कन्चन श्रेष्ठ ८, अश्मिता खरेल डक र सोनी पाख्रिन ३ रनमा आउट भइन् । मधेशको लागि पुजा महतोले ४ ओभरमा १ मेडनसहित १५ रन खर्चेर २ विकेट लिइन् ।

त्यस्तै कविता गौतमले एक विकेट लिइन् । बागमतीले दोस्रो खेलमा शुक्रबार कोशीसँग खेल्नेछ । उता मधेशले दोस्रो खेल नेपाल एपिएफ क्लबसँग खेल्नेछ ।