काठमाडौं (हाम्रो खेलकुद) – अलराउन्डर कविता जोशीको अलराउन्ड प्रदर्शनमा सुदूरपश्चिम प्रदेशले प्रधानमन्त्री कप महिला टि२० राष्ट्रिय प्रतियोगितामा लगातार तेस्रो जित हात पारेकोछ । सोमबार बागमती प्रदेशलाई ६ विकेटले हराउँदै शीर्ष चार सम्भावना मजबुत बनाएको छ ।

जितको लागि ८८ रनको सामान्य लक्ष्य सुदूरले १९ ओभरमा ४ विकेट गुमाउँदै पूरा गर्यो । सुदूरको जितमा कविता जोशी २२ बलमा ४ चौकासहित २७ रनमा नट आउट रहिन् ।

ओपनर रुवि पोदार ९, अनु कडायत १ र सम्झना खड्का ७ रनमा आउट भइन् । बागमतीकी सोनी पाख्रिन र अश्मिना कर्माचार्यले १–१ विकेट लिइन् ।

त्यसअघि टियु क्रिकेट मैदानमा टस जितेर पहिला ब्याटिङ रोजेको बागमती प्रदेशले २० ओभरमा ८ विकेट गुमाउँदै ८७ रन बनाएको थियो । ओपनर कन्चन श्रेष्ठले ४२ बलमा सर्वाधिक १६ रन बनाइन् । ओपनर हेलिसा गुरुङ १० बलमा ३ चौकासहित १६ रनमा आउट भइन् ।

तीव्र गतिकी बलर मनिषा चौधरीले चौथो ओभरको दोस्रो बलमा हेलिसालाई बोल्ड गर्दा बागमती ३.२ ओभरमा २२(१ को अवस्थामा थियो । हेलिसाले आक्रामक सुरुवात दिलाउँदै आउट भएपनि त्यसपछि बागमतीले खेलमा निकै सुस्त ब्याटिङ गरेको थियो ।

सोनी पाख्रिन ३० बलमा १ चौकासहित १३, यशोदा विष्ट र अश्मिना कर्माचार्य १–१ रनमा आउट भइन् । सलिना सिलवालले १० र विपिशा शाहीले ९ रन बनाइन् ।

सुदूरपश्चिमकी कविता जोशीलेले ४ ओभरमा १४ रन खर्चेर २ विकेट लिइन् । त्यस्तै अर्की स्पिनर लक्ष्मी साउदले ४ ओभरमा ११ रन खर्चेर २ विकेट लिइन् । मनिषा चौधरी र जानकी थापाले समान एक विकेट लिइन् । सुदूरपहिलो खेलमा एपिएफसँग ९ विकेटले पराजित भएको थियो । त्यसपछि लुम्बिनीलाई ९ विकेट र कर्णालीलाई ८१ रनले हराएको थियो ।

उता बागमतीले पहिलो खेलमा मधेशलाई २८ रनले हराएको थियो । कोशीसँग ८ विकेटले हार्दा गण्डकीलाई ४ विकेटले हराएको थियो । सुदूरपश्चिले बुधबार मधेश तथा बागमतीले लुम्बिनीसँग खेल्नेछन् ।