एजेन्सी – अफगानिस्तानले पहिलो एकदिवसीय अभ्यास खेलमा घरेलु टोली युएईमाथि १ सय ९ रनको फराकिलो जित हात पारेको छ । जितको लागि २ सय १५ रनको मध्यम विजयी लक्ष्य पछ्याएको युएई ३० ओभरमा १ सय ५ रनमा अल आउट भयो ।

युएईका युवा ब्याटर ध्रुव पराशर ६१ बलमा ४ चौकासहित सर्वाधिक ३८ रनमा अविजित रहे । मोहम्मद जवादुल्लाह ४२ बलमा १ चौका र १ छक्कासहित २४ रनमा आउट भए । एक समय ६६-९ को अवस्थामा पुगेको युएईलाई ध्रुव र जवादुल्लाले अन्तिम विकेटका लागि ३९ रनको साझेदारी गर्दै एक सय रनको आकंडा पूरा गराएका थिए ।

कप्तान मोहम्मद वासिम २ र आयन खान अफ्जल ७ रनमा आउट भए । अभ्यास खेल हुँदा युएईले यू१९ खेलका खेलाडीलाई खेलमा बढी मौका दिएको थियो ।

ओपनर सागर कल्याण १, तानिश सुरी ७, मयंक चौधरी ९, राहुल चोपरा र समाल उदावाथाथा शून्यमा आउट भए । अफगानिस्तानका यामिन अहमादजाईले ६.४ ओभरमा १ मेडनसहित २२ रन खर्चेर ५ विकेट लिए । बिलाल सामी र फरिद अहमदले २–२ विकेट लिए ।

त्यसअघि शारजाह क्रिकेट स्टेडियममा टस हारेर पहिला ब्याटिङको निम्तो पाएको अफगानिस्तान ४७.२ ओभरमा २ सय १४ रनमा अल आउट भयो ।

अफगानिस्तानका गुलबदीन नाइबले ५१ बलमा ५ चौकासहित ४२ रन बनाए । त्यस्तै बहिर शाहले ६४ बलमा ४ चौका र १ छक्कासहित ४४ रन बनाए । ओपनर हियाज हनि १३, मोहम्मद इशाक २२, रहमात शाह ३८, कप्तान हश्मातुल्लाह शाहिदी ९ र आजमतुल्लाह ओमरजाई २ रनमा आउट भए ।

युएईका तीव्र गतिका बलर अकिफ राजाले सर्वाधिक ३ विकेट लिए । मोहम्मद जवादुल्लाह, मोहम्मद जुहैब र ध्रुब पराशरले २–२ विकेट लिए । दोस्रो तथा अन्तिम अभ्यास खेल बुधबार हुनेछ । त्यसपछि तीन खेलको टि२० आई खेलको सिरिज हुनेछ ।