काठमाडौं (हाम्रो खेलकुद) – करण केसीको अलराउन्ड प्रदर्शनमा नेपाल पुलिस क्लबले प्रो क्लब टि२० च्याम्पियनसिपमा पर्सा क्लब ११ लाई २५ रनले हराएको छ । जितको लागि १ सय २५ रनको विजयी लक्ष्य पछ्याएको पर्साले निर्धारित २० ओभरमा ८ विकेट गुमाउँदै ९९ रन बनायो ।

पर्साका पवन सरार्फले २६ बलमा १ चौका र ३ छक्कासहित सर्वाधिक ३२ रन बनाए । सन्दीप लामिछानेले २८ बलमा २ छक्कासहित २३, सुरज पटेल १७, अनिल शाह डक र रुपेश सिंह १५ रनमा आउट भए ।

पुलिसका करण केसी, ललित राजवंशी र सागर ढकालले समान दुई विकेट लिए । राशिद खान र शेर मल्लले १(१ विकेट लिए ।
त्यसअघि नारायणी क्रिकेट ग्राउन्ड बिरगंजमा टस हारेर पहिला ब्याटिङको निम्तो पाएको पुलिसले निर्धारित २० ओभरमा ६ विकेट गुमाउँदै १ सय २४ रन बनायो ।

पुलिसका करण केसीले १२ बलमा २ चौका र २ छक्कासहित सर्वाधिक २९ रन बनाए । अमित श्रेष्ठ २६, आरिफ शेख २२, शंकर राना १८ र अर्जुन साउद ११ रन बनाए । पर्साका अनिल शाहले दुई, साम्सद मानसुरी र रुपेश सिंहले १-१ विकेट लिए ।

६ टोली सहभागी प्रतियोगिता शीर्ष चार टोली सेमिफाइनल खल्नेछन् । आर्मी सुरुवाती चार खेलका साथ सेमिफाइनलमा पुगि सकेको छ ।