विनोद सिंह विष्ट, बैतडी

बैतडीमा जारी प्रधानमन्त्री कप एकदिवसीय राष्ट्रिय क्रिकेट प्रतियोगिताको सुदूरपश्चिम प्रदेशस्तरीय छनेटमा बझाङले दार्चुलालाई ७ विकेटले हराउँदै विजयी सुरुवात गरेको छ ।

जितका लागि पाएको ९१ रनको झिनो लक्ष्य बझाङले १५.२ ओभरमा ३ विकेटको क्षतिमा भेट्टायो। जसमा अभिनाश मल्लले ४४ रनको योगदान गरे। उनी म्यान अफ द म्याच समेत चुनिए । दार्चुलाका लागि नरेन्द्र महराले २ विकेट हात पारे।

त्यसअघि दशरथचन्द क्रिकेट मैदान,सुन्दरखालीमा टस जितेर पहिला ब्याटिङ गरेको दार्चुला १७.५ ओभरमा ९० रनमा अल आउट भयो । उसका विपिन धामीले सर्वाधिक २८ रन बनाए। बझाङका सुशील रावल र अशोक धामीले ३र३ विकेट लिए।

पहिलो खेलमै जित निकालेको बझाङले च्याम्पियन बन्ने सम्भावना छ। दार्चुला भने लगातार ३ खेल हार्दै प्रतियोगिताबाट घर फर्किएको छ। प्रतियोगिता अन्तरगत बुधबार बझाङ र डडेल्धुरा प्रतिस्पर्धा गर्नेछन् ।

सुदूरपश्चिम प्रादेशिक क्रिकेट संघको आयोजना तथा बैतडी जिल्ला क्रिकेट संघको सहआयोजनामा पुस ८ गतेदेखि प्रतियोगिता सञ्चालन भएको हो। प्रादेशिक क्रिकेट संघले यसवर्षदेखि दुई चरणमा प्रदेश छनौट गरिररहेको छ।

प्रादेशिक क्रिकेट संघले यस वर्ष देखि दुई चरणमा प्रदेश छनोट गरेको छ । पहिलो चरणमा बैतडीमा प्लेट च्याम्पियनसिपमा दार्चुला,बझाङ,डडेल्धुरा र डोटी छन् ।

जसको विजेताले ईलिट च्याम्पियनसिपमा बैतडी,कैलाली,कञ्चनपुर र अछामसँग खेल्न पाउनेछ । गत वर्षको प्रदेश छनोटमा सेमिफाइनल पुगेका टोलीले सोझै ईलिट च्याम्पियनसिप र सेमिफाइनलमा नपुगेका टोलीले प्लेट च्याम्पियनसिप खेल्न लागेका हुन्।