एजेन्सी – अनुभवी ब्याटर डिएन एल्गरको सानदार शतकमा दक्षिण अफ्रिकाले पहिलो टेस्ट खेलमा भारतविरुद्ध अग्रता लिएको छ । दोस्रो दिनको समाप्तिमा दक्षिण अफ्रिका पहिलो इनिङमा ६६ ओभरमा ५ विकेट गुमाउँदै २ सय ५६ रन बनाएको छ । दक्षिण अफ्रिका ११ रनले अघि छ ।

दक्षिण अफ्रिकाका डिएन एल्गर २ सय ११ बलमा २३ चौकासहित १ सय ४० रनमा क्रिजमा छन् । डेविड बेडिंघम ८७ बलमा ७ चौका र २ छक्कासहित ५६ रनमा आउट भए ।

डेब्यू खेल खेलेका डेविड शिराजको बलमा बोल्ड आउट भएका थिए । एडेन माक्ररम ५, टोनी डी जोर्जी २८ र केगन पिटरसनले २ रन बनाए । भारतका जस्प्रित बुमराह र मोहम्मद शिराजले समान दुई विकेट लिएका छन् ।

त्यसअघि टस हारेर पहिला ब्याटिङको निम्तो पाएको भारत २ सय ४५ रनमा अल आउट भएको थियो । भारतका लोकेश राहुलले १ सय ३७ बलमा १४ चौका र ४ छक्कासहित १ सय १ रनको शतकीय इनिङ खेलेका थिए । उनी तीव्र गतिका बलर नान्द्रे बर्गरको बलमा बोल्ड आउट भएका थिए ।

विराट कोहलीले ६४ बलमा ५ चौकासहित ३८ रन बनाए । ओपनर यशस्वी जैसवाल १७, रोहित शर्मा ५, शुभमन गिल २, श्रेयस ऐर ३१, रविन्द्रन आश्विन ८, शार्दुल ठाकुर २४, जस्प्रित बुमराह १ र मोहम्मद शिराज ५ रनमा आउट भए ।

दक्षिण अफ्रिकाका कागिसो रबाडाले सर्वाधिक पाँच विकेट लिए । डेब्यू खेल खेलेका नान्द्रे बर्गरले ३, मार्को यानसन र जेराल्ड काट्जीले १-१ विकेट लिए ।