एजेन्सी – तीव्र गतिका बलर अली नासिर र ओपनर अर्यान लाक्राको उत्कृष्ट प्रदर्शनमा युएईले दोस्रो टि२० आई खेलमा अफगानिस्तानलाई ११ रनले हराएको छ । योसँगै तीन टि२० आई खेलको सिरिज १-१ को बराबरीमा पुगेको छ ।

जितको लागि १ सय ६७ रनको विजयी लक्ष्य पछ्याएको अफगानिस्तान १९.५ ओभरमा १ सय ५५ रनमा अल आउट भयो । अफगानिस्तानका मोहम्मद नाबीले २७ बलमा ५ चौका र २ छक्कासहित सर्वाधिक ४७ रन बनाएपनि जितको लागि पर्याप्त हुन सकेन ।

ओपनर हज्रतुल्लाह जजाई ३६, रहमानउल्लाह गुरबाज २१, इब्राहिम जद्रान ४ र नाजिबउल्लाह जद्रान १२ रनमा आउट भए । युएईका मोहम्मद जवादुल्लाहले ४ ओभरमा २६ रन खर्चेर ४ विकेट लिए । अली नासिरले ४ ओभरमा १ मेडनसहित २४ रन खर्चेर ४ विकेट लिए । जुनैद सिद्दिक र अकिफ राजाले १–१ विकेट लिए ।

त्यसअघि शारजाह क्रिकेट रंगशालामा टस जितेर पहिला ब्याटिङ रोजेको घरेलु टोली युएईले निर्धारित २० ओभरमा ७ विकेट गुमाउँदै १ सय ६६ रन बनाएको थियो । युएईको जितमा ओपनर आर्यन लाक्रा ४७ बलमा ३ चौका र ४ छक्कासहित ६३ रनमा नट आउट रहे ।

मोहम्मद वासिम ३२ बलमा ४ चौका र ३ छक्कासहित ५३ रनमा आउट भए । अन्य कुनैपनि ब्याटरले राम्रो प्रदर्शन गर्न सकेनन् । अफगानिस्तानका क्विस अहमद र आजमतुल्लाह ओमरजाईले समान दुई विकेट लिए । पहिलो खेलमा अफगानिस्तान ७२ रनले विजयी भएको थियो । तेस्रो तथा अन्तिम खेल मंगलबार हुनेछ ।