काठमाडौं (हाम्रो खेलकुद) – प्रधानमन्त्री कप राष्ट्रिय प्रतियोगिता २०८० का शीर्ष चार टोलीले थ्री डे इलिट ट्रफी खेल्न पाउने भएका छन् । नेपाल क्रिकेट संघ (क्यान) ले आफ्नो वाार्षिक क्यालेन्डर सार्वजनिक गर्दै उक्त जानकारी दिएको छ ।

७ प्रदेश र तीन विभागीय गरि कुल १० टोली सहभागी प्रधानमन्त्री कप १२ जनवरी देखी ३ फेब्रुअरी सम्म टियु, मुलपानी र भैरहवाको सिद्धार्थ रंगशालामा हुनेछ । पिएमकप पहिलो पटक राउन्ड रोविन अर्थात सबै टोलीले एक अर्कासँग खेल्नेछन् । हरेक टोलीले एक अर्कासँग खेलेपछि शीर्ष चार टोलीले सेमिफाइनल खेल्नेछन् ।

यस पटक देखी पिएमकपका शीर्ष चार टोलीले इलिट ट्रफी खेल्न पाउनेछन् । उक्त इलिट ट्रफी थ्री डे शैलीमा हुनेछ । तालिका अनुसार फेब्रुअरी, मार्च र अप्रिलको समयमा हुनेछ ।

‘यसअघि हामीले सेमिफाइनल र फाइनल थ्री डे मा गर्ने भनेका थियौं । तर नेपालको ब्यस्त तालिकाको कारण हामीले अव इलिट ट्रफी आयोजना गर्ने छौं । शीर्ष चार टोलीले खेल्न पाउनेछन् । पिएमकपको महत्व बढाउन त्यो गर्न लागेका हौं । शीर्ष चारमा पुग्न सके अतिरिक्त खेलहरु खेल्न पाउँछौं भन्ने सन्देश दिन चाहन्छौं । जसले गर्दा प्रदेशहरु घरेलु क्रिकेटमा लगानी गर्न सक्रिय हुनुन्छ भनेर’, क्यानका सचिव पारस खड्काले भने ।

प्रधानमन्त्री कपमा हाल सबै जिल्लाहरुको छनोट सकिएको छ । हाल सबै प्रदेशमा प्रदेश छनोट जारी छ ।