एजेन्सी – जिम्बावेले दोस्रो टि२० आई खेलमा घरेलु टोली श्रीलंकामाथि ४ विकेटको रोमान्चक जित हात पारेको छ । योसँगै तीन टि२० आई खेलको सिरिजमा जिम्बावेले १–१ को बराबरी गरेको छ ।

जितको लागि १ सय ७४ रनको विजयी लक्ष्य पछ्याएको जिम्बावेले १९.५ ओभरमा ६ विकेट गुमाउँदै पूरा गर्यो । जिम्बावेका ओपनर क्रेग इर्विनले ५४ बलमा ६ चौका र २ छक्कासहित सर्वााधिक ७० रन बनाए ।

जिम्बावेलाई जितको लागि अन्तिम ६ बलमा २१ रन चाहिँएको थियो । एन्जिलो म्याथ्युजलाई पहिलो बल ल्यूक जोंग्वेले लङअनमा छक्का हाने । तर उक्त बल नो हुँदा दोस्रो फ्रि हिट बलमा चौका हाने ।

दोस्रो बलमा लङअनमा छक्का हानेपछि चार बलमा जितको लागि तीन रन चाहिँएको थियो । तेस्रो बल डट हुँदा चौथो बलमा महेश थिक्सेनाले सहज क्याच छाड्न पुगेका थिए । पाँचौं बलमा छक्का हान्दै जोंग्वेले रोमान्चक जित दिलाए ।

जिम्बावेको जितका हिरो जोंग्वे १२ बलमा २ चौका र २ छक्कासहित २५ रनमा नट आउट रहे । क्लाइभ माडान्डे ५ बलमा २ छक्कासहित १५ रनमा नट आउट रहे । श्रीलंकाका महेश थिक्सेना र दुश्मन्था चामिराले २-२ विकेट लिए ।

त्यसअघि कोलोम्बोमा टस हारेर पहिला ब्याटिङको निम्तो पाएको श्रीलंकाले निर्धारित २० ओभरमा ६ विकेट गुमाउँदै १ सय ७३ रन बनाएको थियो ।

श्रीलंकाका अनुभवी ब्याटर एन्जिलो म्याथ्युज ५१ बलमा ६ चौका र २ छक्कासहित ६६ रनमा नट आउट रहे । चरिथ असलंका ३९ बलमा ५ चौका र ३ छक्कासहित ६९ रनमा क्याच आउट भए ।

एक समय २७-४ को खराब अवस्थामा पुगेको श्रीलंकालाई पाँचौं विकेटका लागि म्याथ्युज र असलंकाले ७९ बलमा १ सय १८ रनको शतकीय साझेदारी गर्दै खेलमा फर्काएका थिए ।

जिम्बावेका ब्लेसिङ मुर्जाबानी र ल्यूक जाेंगवेले २-२ विकेट लिए । रिचर्ड न्गाराव र वेलिंटन मसाकाड्जाले १-१ विकेट लिए । पहिलो खेलमा श्रीलंका ३ विकेटले विजयी भएको थियो । तेस्रो तथा अन्तिम निर्णायक खेल बिहीबार हुनेछ ।