एजेन्सी – भारतले आइसिसी यू १९ विश्व कप क्रिकेटमा लगातार दोस्रो जित हासिल गरेको छ । भारतले बिहीबार आयरल्यान्डलाई २ सय १ रनको फराकिलो अन्तरले पराजित गरेको छ ।

३ सय २ रनको लक्ष्य पछ्याएको आयरल्यान्ड २९.४ ओभरमा १ सय रनमा अलआउट भएको थियो । भारतका लागि नमन तिवारीले १० ओभरमा ५३ रन खर्चेर ४ विकेट, सौम्य पाण्डेले ९ ओभरमा २१ रन खर्चेर ३ विकेट लिएका थिए । धनुष गोन्डा, मुरुगान अभिषेक र कप्तान उदय शरणले समान १ विकेट लिएका थिए ।

त्यसअघि आयरल्यान्डले टस जितेर भारतलाई ब्याटिङका लागि बोलाएको थियो । भारतले मुसिर खानको शतक र कप्तान उदयको अर्धशतकको मद्दतमा निर्धारित ५० ओभरमा ७ विकेट गुमाएर ३ सय १ रन बनाएको थियो ।

तेस्रो नम्बरमा ब्याटिङ गरेका मुसिरले १ सय ६ बलमा ९ चौका र ४ छक्काको मद्दतमा १ सय १८ रन बनाएका थिए । मुसिर खेलेको म्यान अफ दी म्याच चुनिएका थिए । ८४ बलमा उदयले ४ चौकाको मद्दतमा ७५ रन बनाएका थिए ।

ओपनर आर्षिन कुलकर्णीले ३२, अराभेली अभानिषले २२, सचिन दासले २१, अर्का ओपनर १७ रन बनाएका थिए । आयरल्यान्डका ओलिभर रिलेले ३, जोन म्याकनेलीले २ र फिन लुटोनले १ विकेट लिएका थिए ।

पहिलो खेलमा बंगलादेशलाई हराएको भातर समूह एमा ४ अंकसहित शीर्षस्थानमा छ । बंगलादेश र आयरल्यान्डको समान २ अंक छ भने अमेरिका अंक विहिन छ ।