काठमाडौं (हाम्रा खेलकुद)– त्रिभुवन आर्मी फुटबल क्लब र ठमेल टेरिजम डेभलपमेन्ट काउन्सिल दोस्रो भेट्रान्स फुटबल प्रतियोगिताको क्वार्टरफाइनलमा पुगेका छन् ।

फुटबलर्स मिसन टुगेदरको आयोजनामा जारी प्रतियोगिताको समूह चरणको अन्तिम दिन बुधवार जित निकाल्दै आर्मी र ठमेल टुरिजम अन्तिम ८ मा पुगेका हुन् ।

थिमीस्थित मध्यपुर युथ एसोसियसनको मैदानमा भएको खेलमा आर्मीले सानोगौचरण नाइटकिङ (एसएनकेसी) लाई पेनाल्टी सुटआउटमा ३–१ ले पराजित गर्यो । निर्धारित समय १–१ को बराबरीमा टुंगिएपछि खेल टाइब्रेकरमा पुगेको थियो ।

निर्धारित समयसम्म आर्मीका हरि महतो र सानोगौचरणका जगतमान लामाले गोल गरे । आर्मीका महेन्द्र खवास प्लेयर अफ दी म्याच घोषित भए र उनलाई राष्ट्रिय टोलीका सदस्य भरत खवासले पुरस्कृत गरे ।

ठमेल चितवन भेट्रान्स एफसीलाई ४–० ले पराजित गर्यो । ठमेलका टासी छिरिङ, विशाल राई, रमेश गुरुङ र भेषराज राईले गोल गरे । ठमेलका टासी छिरिङ प्लेयर अफ दी म्याच चुनिए र उनलाई आठौं साफका स्वर्ण पदक विजेता कराते खेलाडी रवि महर्जनले पुरस्कृत गरे ।

प्रतियोगितामा बिहीवार क्वार्टरफाइनल खेल हुनेछन् । पहिलो क्वाटरफाईनल हाम्रो धरान भेट्रान्स फुटबल क्लब र सरस्वतीनगर भेट्रान्स, दोश्रो बानेश्वर फ्रेण्डससिप र फ्रिडम फाईटर , तेश्रो आर्मी र किङकम स्पोर्टस क्लब तथा चौथो ठमेल र एनआरटीबीच हुनेछ आयोजकले जनाएको छ ।