काठमाडौँ (हाम्रो खेलकुद) – अहिलेसम्म खेलेको सबै आठै खेलमा हार बेहोरेको कोशी प्रदेशले प्रधानमन्त्री कप क्रिकेट अन्तर्गत आफ्नो अन्तिम खेलमा लुम्बिनी प्रदेश विरुद्ध मध्यम योगफल खडा गरेको छ ।  टस हारेर पहिले ब्याटिङ गरेको कोशी ४४.४ ओभरमा १७२ रनमा समेटियो ।

कोशीलाई सस्तैमा समेट्न नर शार्कीले १० ओभरमा २ मेडन सहित ३८ रन दिंदै ४ विकेट लिए । वीर मगरले तीन विकेट लिए भने अभिषेक गौतमले दुई विकेट लिए । यस्तै कृष्ण कार्कीले एक विकेट लिए ।    

कोशीका लागि ओपनर अंकित सुबेदीले सर्वाधिक ४९ रन बनाए । ६५ बलमा ९ चौका प्रहार गरेका उनी अर्धशतक बाट १ रनले चुके ।  सौजन घिमिरेले ६९ बलमा २ चौका र २ छक्का सहित ४३ रनको इनिङ खेले । 

कोशीले अर्का ओपनर समिर कार्कीलाई पहिलो ओभरमा नै शुन्यमा गुमाएको थियो । तेस्रो नम्बरमा आएका मिनाश थापाले राम्रो सुरुवात गरेका थिए । तर ३४ बलमा २५ रन बनाएर उनि ११औ ओभरमा नर शार्कीको बलमा आउट भए ।

सुजन थपलिया पनि कुनै रन नबनाई निर्मल गुरुङको बलमा क्याच आउट हुँदै पेभेलियन फर्किए । आइश भट्टराईले १९ बल खेलेर १० रनमा नरकै शिकार बने । त्यसपछि आउट हुने अंकित थिए । 

सोनु अन्सारीलाई पनि नरले नै १७ रनमा रहेको अवस्थामा आउट गरे । फिर्दोश अन्सारीले मात्र ४ रन बनाउन सके । भुपाल लुइँटेल २० बलमा ५ रन बनाएर वीर मगरको बलमा आउट भए । कमल खत्री शुन्यमा वीरकै शिकार बने ।  

कोशी बिना कुनै अंक पुछारमा रहेको छ । लुम्बिनी भने ७ खेलमा १ जित सहित एक स्थान माथि छ ।