काठमाडौँ (हाम्रो खेलकुद) – प्रधानमन्त्री कप पुरुष क्रिकेट अन्तर्गत फाइनल पुग्नका लागि जित्ने पर्ने खेलमा त्रिभुवन आर्मी क्लबले सामान्य योगफल खडा गरेको छ । टस जितेर पहिले ब्याटिङ रोजेको आर्मीले ३९.१ ओभरमा सबै दश विकेट गुमाउँदै १३२ रन मात्र बनाउन सक्यो ।   

आर्मीको नियमित अन्तरालमा विकेट खसेपछि ठुलो स्कोर बनाउनबाट बन्चित हुन पुयो । आर्मीका ओपनर इमरान शेख सर्वाधिक ६४ बलमा ३ चौका र १ छक्का सहित ३४ रन बनाए । 

यस्तै सोमपाल कामीले ३९ बल खेल्दै २३ रन प्रहार गरे ।  यस्तै कप्तान बिनोद भण्डारीले ४६ बल खेल्दै १९ रन बनाउँदा कुशल मल्लले १० बलमा २ छक्कासहित १५ रन बनाए । भिम शार्की १० रनमा आउट भए । शाहब आलम १२ रनमा नटआउट रहे । 

आर्मीलाई सस्तैमा समेट्न गण्डकीका बिपिन खत्रीले १० ओभरमा ५ मेडन सहित २८ रन खर्चेर २ विकेट लिए । यस्तै कृष्ण पौडेल, अमृत गुरुङ र कमल परियारले पनि दुई-दुई विकेट नै लिए । सन्दिप पराजुली र रोशन गौतमले समान एक-एक विकेट लिन सफल भए । 

गण्डकी ८ खेलमा २ जित सहित ४ अंक बनाउँदै प्रतियोगिताबाट बाहिरिसकेको छ । दोस्रो आर्मीको भने ८ खेलमा ६ जित सहित १२ अंक छ । आर्मीले आज जित हासिल गर्न सकेमा नेपाल पुलिस क्लब विरुद्ध फाइनल खेल्ने पक्का हुने छ ।