सुबास हुमागाईं, काठमाडौं

‘अन्तिमका ४-५ जना ब्याटर समर्थकको हल्ला र समर्थन देखेपछि दबाबमा थिए । हामी यहाँ खेल्न आएको यस्तै अवस्थाको सामना गर्न हो । आशा छ यो अनुभवले उनीहरु सिक्नेछन् ।’

क्यानडाका प्रशिक्षक पुबुदु दासानायकेले नेपालविरुद्ध ७ रनको हारपछि नेपाली समर्थकमाझ खेल्दा आफ्नो टोलीमा परेको असरबारे खुलेर बोले । एक समय सहज जिततर्फ उन्मुख देखिएको क्यानडालाई नेपालको पार्ट टाइम बलरहरुको कसिलो बलिङले समस्या दिएको थियो । कप्तान रोहित पौडेल र अलराउन्डर पवन सर्राफको स्पेलले नेपाल खेलमा फर्किएको थियो ।

३३ औं ओभरमा क्यानडा १७३-३ को अवस्थामा थियो । खेलमा बायाँ हाते निकोलस किर्तन र हर्ष ठाकरबीच साझेदारी पनि जमेको थियो । लाग्थ्यो क्यानडा यहाँबाट सहज जित निकाल्नेछ । दर्शकदिर्घामा पनि चोभार एण्डबाट बिस्तारै मूल गेट तर्फ सोझिने समर्थकको संख्या देखिन थालेको थियो ।

कुशल मल्लले हर्ष ठाकरलाई बोल्ड गरेपछि टियु मैदानमा लामो विश्रामपछि समर्थकको हल्ला सुनियो । बायाँ हाते किर्तनले कुशल मल्ललाई सहजै रोक्न थालेपछि ३८औं ओभरमा रोहित आफैं बलिङमा आए । उनले श्रेयसलाई सोमपालको हातबाट क्याच गराए । त्यसको ३ ओभरपछि रन जोड्न संघर्ष सुरु भएको क्यानडाले सर्वाधिक योगदान दिएका किर्तनलाई पनि गुमायो ।

अघिल्लो ओभरमा चोभार एण्डका दर्शकबाट आलोचनाको हुटिङ्ग सुन्नुपरेका पवन सर्राफले किर्तनलाई बोल्ड गरे । त्यसपछि नेपालले खेलमा पकड जमाउन थाल्यो । र त्यसमा १२ औं खेलाडीको रुपमा समर्थकले निरन्तर साथ दिए ।

एज लागेर २ चौका जानुबाहेक ३५ ओभरपछि क्यानडाले आक्रामक सट खेल्ने आँट नै गरेन । सर्कलबाहिर फिल्ड खोलेर ३० यार्डमा रहेका फिल्डर पनि सर्कलमा राखेर कप्तान रोहितले क्यानडाका खेलाडीलाई लोभ्याए । तर सिंगल लिन पनि क्यानडाका तल्लोक्रमका खेलाडी हतास देखिए । हरेक प्रयासमा समर्थकको आवाजसँगै तीव्र गतिमा नेपाली फिल्डर बलसम्म पुगिरहेका थिए ।

अन्तत: दबाबको सामना गर्न नसक्दा एकपछि अर्को विकेट खस्यो । प्रशिक्षक पुबुदु आफैंले पनि खेलपछि त्यो स्वीकारे । आफ्नो टोलीले समर्थकको दबाब थेग्न सकेन । यतिमात्र होइन उनले डगआउटमा रहँदा नेपालको फिल्डिङ देखाउँदै आफ्नो टोलीलाई यसबाट सिक्न भनेको पनि बताए ।

नेपालको लागि समर्थकको साथ सधैंजसो रहने गरेको छ । क्यानडाविरुद्ध खेलमा भने एक समय दर्शकदिर्घामा समस्या पनि देखियो । पहिलो इनिङ चलिरहँदा चोभार एण्डतर्फ दर्शक र प्रहरीबीच असामान्य परिस्थिति सिर्जना भयो । खेलको सुरुवातदेखि चोभार एण्डको एक समूहमा सन्दीप लामिछानेको नाम लिएर नाराबाजी चलिरहेको थियो । तर त्यसै भिडमा रहेका केहि व्यक्तिले एक्कासी आवेशमा सुरक्षाकर्मीमाथि नै हातपातको प्रयास गरे ।

दर्शकदिर्घालाई उत्तेजित पार्ने लक्ष्यसहित आएको केहि व्यक्तिको संख्यालाई प्रहरीले नियन्त्रणमा लिने प्रयास गर्यो । सामाजिक संजालमा पटक पटक विभिन्न विषयमा सामाजिक अभियन्ता भन्दै प्रस्तुत गर्ने व्यक्तिहरुले दर्शक दिर्घालाई उत्तेजित पार्दै प्रहरीविरुद्ध आक्रमण गर्ने प्रयास गरेपछि उनीहरुलाई छुट्यायो । प्रहरी आफैंले ती व्यक्तिको पहिचान गरेर केहि पर लग्यो ।

दर्शकदिर्घामा हल्ला सुरु भएपछि अम्पायर विनय कुमार झाले एकछिन खेल रोके । तर खटिएका सुरक्षा टोलीले सबै ठिक रहेको संकेत दिएपछि केहि मिनेटमै खेल पुन: सुरु भयो । खेल चल्दा नै स्कोरबोर्ड रहेको पूर्वी कुनामा लगातार दर्शकको नाराबाजीपछि पुन: ती अभियन्तालाई समर्थकमाझ छोडियो । त्यसपछि स्थिति सामान्य बन्यो र दर्शकहरु खेलमा फर्किए ।

तर छोडिएका ति अभियन्ताको समूह भने लगातार नाराबाजीमा व्यस्त रहयो । मैदानमा खेल चलिरहँदा त्यो समूहले खेलको चासो नै नराखी लगातार एक झुण्ड भएर दर्शकमाझ अघि बढ्यो । लाग्थ्यो, खेल हेर्न आएका दर्शक भए खेलतर्फ पनि ध्यान दिन्थे । चोभार एण्डबाट मूल गेट हुँदै भीआइपी क्षेत्रतर्फ आएर अभियन्तासहितको समूहले तारबारमा तोडफोडकै प्रयास गर्यो । स्थिति नियन्त्रण गर्न आएको पुलिसमाथि नै आक्रमणको प्रयासपछि ५ जनालाई भने प्रहरीले नियन्त्रणमा लियो । भिडलाई उत्तेजित पार्ने ती ५ जनालाई समाएपछि भने स्थिति पूर्णत सामान्य बन्यो ।

क्रिकेट मैदानभित्र सन्दीप लामिछानेको अदालती मुद्दालाई लिएर खेलको सुरुवातदेखि नै समय समयमा नारा लागेको थियो । तर त्यसमा प्रहरीले कुनै बल लगाएको थिएन । तर ब्यानर प्रदर्शन गर्दै प्रहरीमाथि बोतल प्रहार भएपछि स्थिति सामान्य बनाउन खोज्दा दुई पक्षबीच समस्या आएको थियो । आम समर्थक पनि पटक पटकको असामान्य परिस्थितिबाट आजित भएको देखिन्थ्यो ।

नेपालमा दर्शकको उपस्थितिलाई लिएर सधैं प्रशंसा हुने गरेको छ । तर विगतमा दर्शकदिर्घाबाट भएको हुलदंगाका कारण नेपालले लामो समय अन्तर्राष्ट्रिय क्रिकेट आयोजना गर्न पाएको थिएन । मैदान बाहिरको मुद्दालाई उठाएर खेललाई बिथोल्न खोज्दा त्यसको परिणाम नराम्रो पनि हुन सक्थ्यो । तर सुरक्षा प्रशासन र बुझ्झकी समर्थकको कारण नराम्रो स्थिति सिर्जना भएन ।

खेल चल्दै जाँदा क्रिकेटलाई माया गर्ने समर्थक अन्त्यसम्म दर्शकदीर्घामा रहिरहे । नेपालले खेल हार्ने नै अवस्था देखिंदा पनि समर्थक साथ दिइरहे । जसकारण खेलाडीले मैदानभित्र जगाएको झिनो आशामा समर्थकले बल दिँदा नतिजा नै बदल्न सक्ने शक्ति आयो । यसैकारण विपक्षी प्रशिक्षकले पनि नेपाली समर्थकको खुलेर प्रशंसा गरे ।