काठमाडौं (हाम्रो खेलकुद) – नेपालले क्यानडाविरुद्ध एकदिवसीय अन्तर्राष्ट्रिय (ओडीआई) सिरिजको तेस्रो खेल ९ विकेटले जित्दै सिरिज क्लिनस्विप गरेको छ ।

ओपनर अनिल शाह र मध्यक्रमका ब्याटर भीम सार्कीले शतक बनाएपछि नेपालले सहज जित दर्ता गरेको थियो । सोमबार टियु अन्तर्राष्ट्रिय क्रिकेट मैदानमा क्यानडाले प्रस्तुत गरेको २ सय ३३ रनको लक्ष्य नेपालले ४५ औं ओभरमा १ विकेट गुमाउँदै पूरा गर्यो ।

अनिल र भीमको शतकीय इनिङसँगै कीर्तिमानी साझेदारीमा नेपालले सहज जित दर्ता गरेको हो । यसअघि पहिलो खेल ७ रन र दोस्रो खेल ४ विकेटले जितेको नेपालले ३-० ले सिरिज क्लिनस्विप गर्यो । यसक्रममा नेपालले ३ कीर्तिमान पनि बनायो ।

१. एकै खेलमा दुई शतक

नेपालका लागि अनिल र भीमले शतक बनाउँदै पहिलो पटक ओडीआईको एकै खेलमा दुई शतक बनाए । अनिलले १ सय १२ रनको योगदान दिँदा भीम पनि १ सय १ रनमा नटआउट रहे । अनिलले १ सय २४ बलमा १२ चौका र २ छक्का प्रहार गरे । भीमले १ सय २९ बलमा ११ चौका र १ छक्का जोडेका थिए ।

२. अनिल र भीमको कीर्तिमानी साझेदारी

अनिल र भीमले ओडीआई क्रिकेटमा नेपालका लागि सबैभन्दा ठूलो साझेदारी पनि बनाए । दोस्रो विकेटका लागि यी दुईले १ सय ८९ रनको साझेदारी गरे । यसअघि सन् २०२३ मा कुशल भुर्तेल र आसिफ शेखले जिम्बावेविरुद्ध १ सय ७१ रनको साझेदारी गरेका थिए ।

३. पहिलो पटक घरेलु सिरिजमा क्लिनस्विप

नेपालले पहिलो पटक घरेलु सिरिजमा क्लिनस्विप गरेको हो । यसअघि नेपालले ओमानमा भएको पिएनजीविरुद्ध २ खेलको सिरिज २-० ले जितेको थियो । घरेलु भूमिमा भने नेपालले यूएईविरुद्ध ओडीआई सिरिज २-१ ले विजयी भएको थियो ।

यो पनि : अनिल र भीमको शतकमा नेपालको सिरिज क्लिनस्विप