काठमाडौं (हाम्रो खेलकुद) – नेपाल ‘ए’ का कार्यवाहक कप्तान सन्दीप जोराले क्यानडा-११ विरुद्ध एकदिवसीय सिरिजको दोस्रो खेलमा अर्धशतक प्रहार गरेका छन् ।

क्यानडाले प्रस्तुत गरेको २ सय ४१ रनको लक्ष्य पछ्याउने क्रममा सन्दीपले अर्धशतक प्रहार गर्दै नेपालको इनिङ सम्हालेका छन् । सुरुवातमा लगातार दुई विकेट गुमाएपछि ओपनर अर्जुन कुमालसँग तेस्रो विकेटका लागि बलियो साझेदारी निर्माण गरेका छन् ।

नेपाल २३ ओभरको समाप्तिमा १ सय १ रन जोड्दै २ विकेट गुमाएको अवस्थामा छ । सन्दीपले ६६ बलमा अर्धशतक पूरा गरेका थिए । उनी ६८ बलमा ७ चौकासहित ५५ रन बनाएर खेलिरहेका छन् । अर्जुन ५९ बल खेल्दै ३६ रनमा छन् । यी दुईले ८८ रनको साझेदारी गरिसकेका छन् ।

नेपालले इनिङको पहिलो बलमा मयन यादवलाई गुमाएको थियो । नेपालमा पहिलो खेल खेलिरहेका अमर खालिदले उनलाई एलबीडब्लू धरापमा पारेका थिए । तेस्रो ओभरमा शेर मल्ल पनि आउट भए । उनी ११ बलमा १ चौकासहित ७ रन जोड्दै खालिदकै बलमा कट बिहाइन्ड भए । त्यसबेला नेपाल १३-२ को स्थितिमा थियो ।

त्यसअघि क्यानडाले ४९.५ ओभरमा अलआउट हुँदै २ सय ४० रन जोडेको थियो । श्रेयस मोभाले अर्धशतक बनाउँदै क्यानडालाई बलियो स्कोरसम्म पुर्याएका थिए ।