काठमाडौं (हाम्रो खेलकुद) – नेपालले क्यानडाविरुद्ध आइसीसी क्रिकेट विश्वकप लिग-२ अन्तर्गत क्यानडा भ्रमणको पहिलो खेलमा पुनरागमनको संकेत देखाएको छ ।

नेपालले लगातार विकेट लिँदै घरेलु टोली क्यानडालाई दबाबमा राख्न सफल भएको छ । ३७ ओभरको समाप्तिमा क्यानडाले ५ विकेट गुमाएर १ सय ३४ रन जोडेको छ । क्रिजमा निकोलस किर्तन १४ रन जोडेर खेलिरहेका छन् ।

क्यानडाका मध्येक्रमका ब्याटर हर्ष ठाकर रन आउट हुँदा नेपालले चौथो सफलता पाएको थियो । दीपेन्द्रसिंह ऐरीको बलमा विकेटकिपर आसिफ शेखद्वारा ठाकर रन आउट भए ।

लगत्तै विकेटकिपर श्रेयस मोभा पनि कप्तान रोहित पौडेलको शिकार बने । उनी ४ रन जोड्दै गुलशन झाबाट क्याच आउट भए ।

त्यसअघि ललित राजवंशीले पहिलो, सन्दीप लामिछानले दोस्रो र गुलसन झाले तेस्रो विकेट लिएका थिए । तीव्रगतीका बलर गुलसन झाले क्यानडाका ओपनर नवनित धालीवालको विकेट लिएका छन् । धालीवाल ९० बलमा ४८ रन बनाउँदै झाको बलमा कुशल भुर्तेलबाट क्याच आउट हुन पुगे ।

३३औं ओभरको पहिलो बलमा नै ओपनर धालीवाल आउट भएका हुन् । क्यानडाले अहिले ३३औं ओभरमाको समाप्तीमा ३ विकेट गुमाएर १ सय १३ रन बनाएको छ ।

सन्दीप लामिछानेले नेपाललाई दोस्रो सफलता दिलाएका थिए । सन्दीपले ३५ बलमा १७ रन बनाएर खेलिरहेका प्रगत सिंहलाई एलबिडब्लु आउट गराएका हुन् ।

करिब १३ महिना पछि ओडिआईमा पुनरागमन गरेका सन्दीपले पुनरागमन खेलमा विकेट लिएका हुन् ।

ललितनारायण राजवंशीले नेपाललाई पहिलो सफलता दिलाएका थिए । उनले इनिङमा आफ्नो पहिलो बलमा नै विकेट लिएका थिए । सातौं ओभरमा बलिङका लागि आएका ललितले पहिलो बलमा नै विकेट लिएका थिए ।

ललितले सातौं ओभरको पहिलो बलमा १६ बलमा १२ रन बनाएका ओपनर आरोन जोनसनको विकेट लिएका हुन् ।