काठमाडौं (हाम्रो खेलकुद) – नरेश मेमोरियल राष्ट्रिय यु १९ क्रिकेट प्रतियेगितामा लुम्बिनी प्रदेशले लगातार दोस्रो जित हासिल गरेको छ ।

लगातार दोस्रो जित निकाल्ने क्रममा सोमवार लुम्बिनीले सुदूरपश्चिम प्रदेशलाई ४१ रनले हराएको छ। पहिलो खेलमा लुम्बिनीले कोशी प्रदेशलाई पराजित गरेको थियो ।

१ सय ५७ रनको लक्ष्य पछ्याएको सुदूरपश्चिमले ३५.४ ओभरमा अल आउट हुँदै १ सय १५ रन मात्र जोड्यो ।

सुदूरपश्चिमका युवराज खत्रीले नट आउट रहँदै सर्वाधिक २२, कैलाश ऐरले २१, प्रकाश पाण्डे र नरेन भट्टले समान १३ तथा अभिषेक थापाले १० रन जोडे ।

लुम्बिनीका लागि रमेश कुर्मीले १० ओभरमा २५ रन खर्चिएर ५ विकेट लिए । सन्तोष यादवले ४ तथा आकाश त्रिपाटीले १ विकेट लिए ।

त्यसअघि विराटनगरमा टस हारेर ब्याटिङको निम्तो पाएको लुम्बिनीले ३८.५ ओभरमा अल आउट हुदै १ सय ५६ रन मात्र बनाउन सक्यो ।

लुम्बिनीका दार्स सुनुवारले सर्वाधिक ३८, निर्मल गुरुङले नट आउट २७ तथा नर सार्कीले २५ रन जोडे । सुदूरपश्चिमका लागि कप्तान हेमन्त धामी, युवराज खत्री र अशोक धामीले समान ३ विकेट लिए ।

लुम्बिनी ४ अंकका साथ शीर्ष स्थानमा छ । पहिलो खेल हारेको सुदूरपश्चिम अंक विहीन छ। कात्तिक २१ सम्म चल्ने प्रतियोगितामा ७ प्रदेशको सहभागिता छ । सिङ्गल राउण्ड रोविनमा हुने प्रतियोगिताको शीर्ष २ टोली फाइनल खेल्नेछन् ।