काठमाडौं(हाम्रो खेलकुद) – सन्तोष यादवको अलराउन्ड प्रदर्शनको सहयोगमा नरेश श्रेष्ठ स्मृती यु १९ राष्ट्रिय क्रिकेट प्रतियोगितामा लुम्बिनी प्रदेशले आफ्नो अपराजित यात्रा जारी राखेको छ ।

पाँचौ खेलमा जितको यात्रा जारी राख्ने क्रममा लुम्बिनीले शनिवार गण्डकी प्रदेशमाथि ५ विकेटको जित हात पार्यो ।

खराब मौसमका कारण ढिला सुरु भएको कारण खेल २७ ओभरमा घटाइएको थियो । ८७ रनको लक्ष्य लुम्बिनीले २२.४ ओभरमा ५ विकेट गुमाएर पूरा गर्यो ।

लुम्बिनीको जितमा सन्तोष यादवले ५१ बलमा ४ चौकाको सहयोगमा सर्वाधिक ४४ रन जोडे । दर्श सोनारले ३१ बलमा १४ तथा विजय कोहरले १४ रन जोडे ।

गण्डकीका अपराजित पौडेल र सिब्रिन पौडेलले समान २ तथा सुदिप अर्यालले १ विकेट आफ्नो नाममा गरे ।

त्यसअघि टस जितेर ब्याटिङ गरेको गण्डकीले निर्धारित २७ ओभरमा ९ विकेट गुमाएर ८६ रनको योगफल तयार गरेको थियो ।

गण्डकीका सोहल कुँवरले ३४ बलमा सर्वाधिक २५ तथा सुजन गौतमले १२ रन जोडे ।

लुम्बिनीका लागि आकाश त्रिपाटी र सन्तोष यादवले समान ३ तथा निर्मल गुरुङ र रमेश कुर्मीले समान १ विकेट लिए ।

पाँचौ खेलमा १० अंक साथ लुम्बिनी शीर्ष स्थानमा छ । गण्डकी भने ५ खेलमा ४ अंकका साथ चौथो स्थानमा छ ।

कात्तिक २१ सम्म चल्ने प्रतियोगितामा ७ प्रदेशको सहभागिता छ । सिङ्गल राउण्ड रोविनमा हुने प्रतियोगिताको शीर्ष २ टोली फाइनल खेल्नेछन् ।