काठमाडौं (हाम्रो खेलकुद) – एसीसी मेन्स यू१९ एसिया कपको तयारीस्वरूप कर्नाटक यू१९ विरुद्ध अभ्यास सिरिजको चौथो खेलमा नेपाल ५ विकेटले पराजित भएको छ ।

नेपालले प्रस्तुत गरेको १ सय ६ रनको लक्ष्य कर्नाटकले ३७ ओभरमा ५ विकेट गुमाउँदै पूरा गर्यो । कर्नाटकको जितसँगै सिरिज २-२ को बराबरीमा पुगेको छ । अन्तिम खेल विहीबार हुनेछ ।

मुलपानी क्रिकेट मैदानमा कमजोर सुरुवात गरेपनि कर्नाटकले मध्यक्रममा सानो साझेदारी गर्दै जित पक्का गर्यो । विपिन महतोले फ्याँकेको चौथो ओभरमा ओपनर प्रतिकलाई १० रनमा गुमाएको कर्नाटकले रन जोड्न संघर्ष गरेको थियो ।

१२ औं ओभरमा गगन राव ८ रन जोड्दै थर्ड म्यानमा क्याच आउट भए । त्यसपछि ऋषभ अपचु शून्य र आदेश ८ रनमा आउट हुँदा कर्नाटक ३४-४ को स्थितिमा पुगेको थियो । तर कप्तान रोहित र शिवले ४१ रनको साझेदारी गर्दै टोलीलाई उकासे ।

कप्तान रोहितले २८ औं ओभरमा विकेटकिपरबाट समातिनुअघि २० रन जोडे । उनले ३३ बलमा २ चौका प्रहार गरे । शिवले नटआउट २४ रन जोडे । अक्षथ प्रभाकरले ३० बलमा ४ चौकासहित २४ रन जोड्दै जित सहज बनाए ।

नेपालका लागि सन्तोष यादवले ३ विकेट लिँदा राजेश यादव र विपिन महतोले १-१ सफलता पाए ।

त्यसअघि टस जितेर पहिलो ब्याटिङ रोजेको नेपालले ३५.१ ओभरमा अलआउट हुनुअघि १ सय ५ मात्र रन जोड्यो । नेपालका लागि ओपनर मयन यादवले ३४ र रोशन विकले नटआउट ३४ रन जोड्नुबाहेक अन्य खेलाडीले दोहोरो स्कोरमा रन जोड्न सकेनन् ।

रोशनले ४६ बलमा ६ चौका प्रहार गरेका थिए । रोशनले अन्त्यतिर संयमित ब्याटिङ गर्दा नेपालले १ सय रन पार गरेको थियो । नेपालको स्कोर ६६ रन हुँदा क्रिजमा आएका रोशनले त्यसपछि एक्लै रनको बागडोर सम्हालेका थिए ।

नेपालले सातौं ओभरमा आकाश त्रिपाठीलाई ७ रनमा गुमाएको थियो । इसा पुथिगेको बलमा बोल्ड हुँदा नेपालले ३५ रन जोडेको थियो । त्यसपछि खुलेर खेल्न नसकेको टोलीले १७ औं ओभरमा कार्यवाहक कप्तान अर्जुन कुमाललाई गुमायो । ५ रनमा खेलिरहँदा अर्जुन पुल खेल्ने धुनमा स्क्वायर लेग पछाडी क्याच आउट भए ।

लगत्तै २ ओभरपछि मयन आउट भएपछि नेपाल ५७-३ को स्थितिमा पुग्यो । मयनले ६१ बलको सामना गर्दै ४ चौका प्रहार गरे । त्यसपछि नेपालले लगातार अन्तरमा विकेट गुमायो । मध्यम गतिका बलर अक्षथ प्रभाकरले आफ्नो ८ ओभरको स्पेलमा ५ विकेट लिँदै नेपाललाई धराशायी पारे । बायाँ हाते स्पिनर प्रणव अश्वथले पनि ३ विकेट लिँदै कसिलो बलिङ गरे । उनले लगतार १० ओभर फ्याँक्ने क्रममा ५ मेडनसहित १० रन मात्र खर्चिए ।

मध्यक्रममा सन्तोष यादव ८ र नरेन भट्टले ३ रन जोड्दा उत्तम मगर, युनिश ठकुरी र युवराज खत्रीले खाता खोल्न सकेनन् । रोशनले एकतर्फबाट लगातार रन जोड्दा अन्यले विकेट जोगाउन सकेनन् । रञ्‍जित कुमारले १ रन जोड्दा विपिनले खाता खोल्न सकेनन् ।

अक्षथको ५ र प्रणवको ३ विकेट सँगै इसा र मलातेशले कर्नाटकका लागि १-१ विकेट लिए ।

सिरिजको अन्तिम खेल विहीबार हुनेछ ।