एजेन्सी – पाकिस्तान आईसीसीको प्रतियोगिता खेल्न अव भारत जान नपर्ने भएको छ । अन्तर्राष्ट्रिय क्रिकेट परिषद् (आईसीसी) को बोर्ड बैठकले पाकिस्तान र भारतमा सन् २०२७ सम्म हुने सबै प्रतियोगिता तटस्थ भूमिमा आयोजना गर्ने निर्णय गरेको छ ।

पाकिस्तानले आगमी फेब्रुअरी मार्चमा च्याम्पियन्स ट्रफी आयोजना गर्दैछ । तर भारतले सुरक्षा कारण देखाउँदै आफू पाकिस्तान नजाने बताउँदै च्याम्पियन्स ट्रफी हाइब्रिड मोडलमा गर्न प्रस्ताव गरेको थियो । यसै महिना सुरुवातमा सम्पन्न आईसीसीको बोर्ड बैठकमा पाकिस्तान क्रिकेट बोर्डका अध्यक्ष मोहसिन नक्भीले भारत च्याम्पियन्स ट्रफी खेल्न आफ्नो देश आउनु पर्ने वा आफूहरुले पनि भारतमा गएर नखेल्ने प्रस्ताव गरेका थिए । त्यसै अनुसार आईसीसीले भारत र पाकिस्तानले २०२७ सम्म आयोजना गर्ने सबै प्रतियोगिता तटस्थ भूमिमा आयोजना गर्ने निर्णय लिएको छ ।

योसँगै पाकिस्तानलाई च्याम्पियन्स ट्रफी आयोजना गर्ने बाटो खुलेकोछ । च्याम्पियन्स ट्रफी सन् २०१७ पछि पहिलो पटक हुँदैछ । पाकिस्तानले २०१७ को फाइनलमा भारतलाई १ सय ८० रनले हराउँदै उपाधि जितेको थियो । च्याम्पियन्स ट्रफी २०२५ मा अष्ट्रेलिया, इंग्ल्यान्ड, दक्षिण अफ्रिका, भारत, बंगलादेश, अफगानिस्तान, न्युजिल्यान्ड र पाकिस्तानबीच हुनेछ । सन् २०२३ को एकदिवसीय विश्वकपका शीर्ष ८ टोलीले च्याम्पियन्स ट्रफी खेल्न पाउने छन् ।

२०२६ मा भारत र श्रीलंकाले संयुक्त रुपमा टी-२० विश्वकप आयोजना गर्नेछन् । उक्त प्रतियोगितामा पाकिस्तानका सबै खेल सम्भव त श्रीलंकामा हुनेछन् । २०२५ मा भारतले महिला विश्वकप आयोजना गर्दैछ ।

पाकिस्तान २०१६ मा टी-२० विश्वकप र २०२३ मा एकदिवसीय विश्वकप खेल्न भारत गएको थियो । तर भारत भने गतवर्ष एसिया कप खेल्न पाकिस्तान नजादा आफ्ना सबै खेल श्रीलंकामा गएर खेलेको थियो । भारत सन् २००५-६ पछि कुनैपनि प्रतियोगिता खेल्न पाकिस्तान गएको छैन ।