काठमाडौं(हाम्रो खेलकुद) – नेपाली राष्ट्रिय क्रिकेट टोलीका अलराउण्डर दीपेन्द्रसिंह ऐरीले आगामी साताबाट सुरु हुने जय ट्रफी मेन्स एलिट कप प्रतियोगिता गुमाउने भएका छन् ।

दीपेन्द्रले युएईमा आयोजना हुने अन्तर्राष्ट्रिय लिग टि ट्वान्टी(आईएल टि ट्वान्टी) मा सहभागी हुन शुक्रवार त्यसतर्फ जाने भएकाले एलिट कप गुमाउने भएका हुन् ।

‘जनवरी ३ मा त्यसतर्फ जादै छु । अघिल्लो पटक गएर पनि खेल्न पाइन । यो पटक खेल्नेमा आशावादी छु,’ दीपेन्द्रले भने ‘नेपाल प्रिमियर लिग(एनपिएल)मा पनि राम्रो प्रदर्शन गरे । त्यहाँ गएर पनि राम्रो गर्ने प्रयत्न गर्नेछु ।’

दीपेन्द्र नेपालको घरेलु प्रतियोगिताहरुमा विभागिय टोली नेपाल पुलिस क्लबको कप्तान हुन् ।

दीपेन्द्रलाई आईएल टि ट्वान्टीको साविक विजेता गल्फ जायन्ट्सले यस संस्करणको लागि रिटेन गरेको हो । आईएल टि ट्वान्टी प्रतियोगिता पुस २७ गतेबाट सुरु हुनेछ । दीपेन्द्र गत संस्करण नामिबियाका कप्तान जेहार्ड एरास्मसको स्थानमा टिममा अनुबन्धित भएका थिए ।

गत संस्करण जायन्ट्स च्याम्पियन भए पनि दीपेन्द्रले कुनै पनि खेलमा मौका पाएनन् । यो संस्करणको आईएल टि ट्वान्टीमा नेपालका अर्का अलराउण्डर कुशल मल्ल पनि डेजर्ट भाइपर्स टिममा अनुबन्ध भएका छन् ।