काठमाडौं(हाम्रो खेलकुद) – ओपनर कुशल भुर्तेलको अर्धशतकमा जय ट्रफी मेन्स एलिट कप दुई दिवसीय क्रिकेटमा नेपाल पुलिस क्लबले मधेश प्रदेशविरुद्ध पहिलो इनिङमा अग्रता बढाएको छ ।

बुधवार सुरु भएको प्रतियोगिताको तेस्रो खेलमा पहिलो दिनको समाप्तीसम्म पुलिसले मधेश सामू ४५ रनको अग्रता बनाएको छ । पहिलो इनिङमा उसको २० ओभर बाँकी नै रहँदा ७ विकेट पनि हातमै रहेको छ ।

पहिलो दिनको समाप्तिसम्म पुलिसले ३ विकेट गुमाएर १ सय ७४ रन बनाएको छ । पुलिसका अमित श्रेष्ठ ३४ र कप्तान आरिफ शेख १३ रनमा नट आउट रहेका छन् ।

पुलिसका लागि ओपनर कुशलले ६८ बलमा १० चौकाको सहयोगमा ६३ रन जोडे । पहिलो विकेटका लागि अर्का ओपनर दीलिप नाथ र कुशल मिलेर ९६ रनको साझेदारी गरे । दीलिप ७९ बलमा ४० रनमा आउट भए । गुलशन झा १४ बलमा २० बनाउँदै आउट भए ।

पहिलो दिनको समाप्तिसम्म मधेशका कप्तान हरिशंकर शाहले २ तथा अभिषेक तिवारीले विकेट लिए ।

त्यसअघि वीरगंजमा टस हारेर ब्याटिङको निम्तो पाएको मधेशले ४२.४ ओभरमा अलआउट हुदै १ सय २९ रन जोडेको थियो ।

मधेशका लागि ओपनर मयन यादवले सर्वाधिक ५९ रन जोडेका थिए । उनले १ सय २ बलमा ५ चौका र २ छक्का प्रहार गरेका थिए ।

निरज यादव २९ रनमा आउट हुँदा अभिषेक तिवारी १७ रनमा नट आउट रहे । एक समय ९९ रनमा २ विकेट मात्र गुमाएर बलियो स्थितिमा रहेको मधेशले पछिल्लो ८ विकेट मात्र ३० रनमा गुमायो । पुलिसका लागि तीव्र गतिका बलर गुलशनले १३ ओभरमा ४० रन खर्चिएर ५ विकेट लिए ।

कुशलले २ , श्रवण यादव र ललितनारायण राजवंशीले समान १ विकेट लिए । पहिलो खेल बराबरी खेलेका दुवै टोलीको समान १५ अंक छ ।

प्रतियोगिताको बाँकी खेल तालिका –

जनवरी ११ देखि १२ सम्म

नेपाल पुलिस क्लबविरुद्ध बागमती प्रदेश – जनकपुर
त्रिभुवन आर्मी क्लबविरुद्ध मधेश प्रदेश – विरगंज

जनवरी १४ देखि १६ सम्म फाइनल खेल – विरगंज