काठमाडौं(हाम्रो खेलकुद) – विभागीय टोली त्रिभुवन आर्मी क्लबले दुई अर्धशतकको सहयोगमा बागमती प्रदेशविरुद्ध मजबुत योगफल तयार गरेको छ ।

जय ट्रफी मेन्स एलिट कपको चौथो खेलको पहिलो इनिङमा ओपनर इमरान शेख तथा बसिर अहमदको अर्धशतकको सहयोगमा आर्मीले बागमतीविरुद्ध बलियो योगफल तयार गरेको हो ।

टस हारेर पहिले ब्याटिङकाे निम्ताे पाएकाे आर्मीले पहिलो इनिङका लागि निर्धारित ६० ओभरमा ५ विकेट गुमाएर २ सय ७६ रन बनाएको थियो ।

आर्मीका लागि ओपनर इमरानले सर्वाधिक ७२ रन जोडे । उनले १ सय ४ बलमा ११ चौका प्रहार गरेका थिए । पहिलो विकेटका लागि इमरानले अर्का ओपनर तृत राज दाससँग मिलेर १ सय ३ रनको शतकीय साझेदारी गरेका थिए । तृत राजले ७८ बलमा ४४ रन बनाएका थिए ।

बसिर ६४ बलमा ५३ रन बनाउँदै नट आउट रहे । बसिरले कुशल मल्लसँग मिलेर छैठौं विकेटका लागि नट आउट ६९ रनको साझेदारी गरे । कुशल ४३ बलमा ३५ रनमा नट आउट रहे । भीम सार्की ५१ बलमा ३२ रन बनाउँदै आउट भए ।

बागमतीका लागि विपिन आचार्यले ३ तथा कप्तान सन्दीप लामिछानेले २ विकेट लिए । सन्दीप प्रतियोगितामा १ सय रन खर्चिने पहिलो बलर बने । उनले २२ ओभरमा १ सय ३ रन खर्चिए ।

बागमतीले आजै आफ्नो पहिलो इनिङको सुरुवात गरेको छ । बागमतीले सुरुवात राम्रो गर्न सकेन । पहिलो दिन बुधवारको खेल समाप्ति हुँदा बागमतीले ५ विकेट गुमाएर १ सय २४ रन जोडेको छ ।

पहिलो इनिङमा बागमती १ सय ५२ रनले पछि रहेको छ । बागमतीका नन्दन यादव र विपिन आचार्य क्रिजमा रहेका छन् । बागमतीका लागि शुभ कसांकार ३४, उत्तम थापा मगर २८, रित गौतम २१ तथा आशुतोष घिरैया ११ रनमा आउट भए ।

आर्मीका आकाश चन्दले ३ तथा सोमपाल कामीको नाममा २ विकेट लिए । दुवै टाेलीले पहिलो खेल बराबरी खेलेका थिए । आर्मीकाे १४ अंक हुँदा बाेनसका कारण बागमतीकाे १५ अंक छ ।

प्रतियोगिताको बाँकी खेल तालिका –

जनवरी ११ देखि १२ सम्म

नेपाल पुलिस क्लबविरुद्ध बागमती प्रदेश – जनकपुर
त्रिभुवन आर्मी क्लबविरुद्ध मधेश प्रदेश – विरगंज

जनवरी १४ देखि १६ सम्म फाइनल खेल – विरगंज