काठमाडौं(हाम्रो खेलकुद) – नेपाली राष्ट्रिय क्रिकेट टोलीका अलराउण्डर दीपेन्द्रसिंह ऐरी सम्मिलित गल्फ जायन्ट्स अन्तर्राष्ट्रिय लिग (आईएल) टि ट्वान्टीमा लगातार दोस्रो जित हासिल गरेको छ ।

आइतवार भएको खेलमा गल्फले सारजहा वारियर्सलाई ६ विकेटले पराजित गरेको हो । गल्फले सातौं खेल खेलिसक्दा पनि दीपेन्द्रलाई डेब्युको अवसर दिएको छैन ।

१ सय ७२ रनको लक्ष्य गल्फले निर्धारित २० ओभर सकिन ३ बल बाँकी रहदै ४ विकेट गुमाएर पूरा गर्यो । गल्फको जितमा ओपनर टोम अल्सोपले नट आउट रहदै सर्वाधिक ८५ जोडे । उनले ६० बलमा ७ चौका र २ छक्का प्रहार गरे ।

टोम करनले १७ बलमा नट आउट २६, ओपनर जेम्स भिन्सले १४ बलमा २४ तथा जेहार्ड एरास्मसले १० रन जोडे । वारियर्सका लागि दिल्शान मधुशंकाले २ तथा एडम जाम्पा र टिम साउदीले समान १ विकेट लिए ।

त्यसअघि सारजहा क्रिकेट स्टेडियममा टस हारेर ब्याटिङको निम्तो पाएको वारियर्सले निर्धारित २० ओभरमा ६ विकेट गुमाएर १ सय ७१ रन जोडेको थियो ।

वारियर्सका लागि जेसन रोयले सर्वाधिक ४४, जोनसन चाल्र्सले १९ बलमा ३० तथा टोम कुलहार क्याडमोरले २५ बलमा २९ रन जोडे । गल्फका लागि ब्लेसिङ मुजवानीले ३ तथा डानियल वारेल, डोमेनिक डार्क र मार्क अडिरले समान १ विकेट लिए ।

जितसँगै गल्फ ७ खेलमा ६ अंकका साथ पाँचौ स्थानमा छ । पराजित वारियर्स समान खेलमा ४ अंकका साथ तालिकाको पुछारमा छ ।