काठमाडौं (हाम्रो खेलकुद) – नेपाल पुलिस क्लबका बलर ललितनारायण राजवंशीले प्रधानमन्त्री (पिएम) कप पुरुष एकदिवसीय राष्ट्रिय प्रतियोगितामा २ वटा मोटरसाइकल जितेका छन् ।

शनिवार सकिएको पिएम कपमा पुलिसलाई च्याम्पियन बनाउन उत्कृष्ट प्रदर्शन गरेका ललितले २ वटा मोटरसाइकल जितेका हुन् । ललित प्रतियोगिताको सर्वोत्कृष्ट खेलाडी तथा उत्कृष्ट बलर चुनिएका थिए।

ललितले पिएम कपको १० खेलमा ४१ विकेट लिएका थिए । उनी पिएम कप एकै संस्करण सर्वाधिक विकेट लिने खेलाडी पनि बनेका छन् । यसअघि बागमती प्रदेशका सूर्य तामाङले गत संस्करणको पिएम कपमा ३० विकेट लिएका थिए ।

ललितले एकै संस्करणको प्रतियोगितामा चार पटक ५ विकेट हल लिने कीर्तिमान समेत बनाए । ललितले पिएम कपको इतिहासमा यसै संस्करणमा १ सय विकेट पूरा गरे।

पिएम कपमा १ सय विकेट पूरा गर्ने ललित पहिलो बलर समेत बनेका छन् । सर्वोत्कृष्ट र उत्कृष्ट भएवापत दुई वटा पल्सर बाइक प्राप्त गरे।

त्यस्तै, गण्डकी प्रदेशका अर्जुन कुमार प्रतियोगिताको उत्कृष्ट ब्याटर घोषित भए । उनले पिएम कपको ९ खेलमा १ शतक सहित ३ सय ७४ रन बनाएका थिए ।

अर्जुनले पल्सर बाइक पाएका छन् । सातौं संस्करणको फाइनलमा शनिवार आर्मीलाई ६ विकेटले हराउँदै पुलिस भएको थियो ।

भैरहवास्थित सिद्धार्थ क्रिकेट मैदानमा १ सय ५५ रनको लक्ष्य पुलिसले २५.५ ओभरमा ४ विकेट गुमाएर पूरा गरेको थियो ।