एजेन्सी – अस्ट्रेलियाले तेस्रो तथा अन्तिम टेस्टअघि नै घरेलु टोली वेस्ट इण्डिजविरुद्धको सिरिज जितेको छ।

नेशनल क्रिकेट स्टेडियम ग्रिनाडामा सोमवार बिहान सकिएको टेस्टमा अस्ट्रेलियाले वेस्ट इण्डिजलाई १ सय ३३ रनले हराएको छ।

सिरिजमा अस्ट्रेलिया २-० ले अघि रहेको छ । पहिलो टेस्ट अस्ट्रेलियाले १ सय ५९ रनले जितेको थियो ।

२ सय ७७ रनको लक्ष्य पछ्याएको वेस्ट इण्डिज १ सय ४३ रनमा समेटियो । वेस्ट इण्डिजका कप्तान रोस्टन चेस सर्वाधिक ३४ रनमा बनाए ।

शेमार जोसेफ २४, शाई होप १७, ब्रान्डन किंग १४, अल्जारी जोसेफ १३ तथा केसी कार्टी १० रनमा आउट भए ।

अस्ट्रेलियाका लागि नाथन लायन र मिचेल स्टार्कले समान ३, जोस हेजलवुडले २ तथा प्याट कमिंस र बेयु वेबस्टारले समान १ विकेट लिए ।

पहिलो इनिङमा ३३ रनले अघि रहेको अस्ट्रेलियाले दोस्रो इनिङमा २ सय ४३ रन थप्दै २ सय ७६ रनको अग्रता बनाएको थियो ।

दोस्रो इनिङमा अस्ट्रेलियाका क्यामरन ग्रिन र स्टिभ स्मिथले अर्धशतक बनाएका थिए । स्मिथले सर्वाधिक ७१ र ग्रिनले ५२ रन जोडेका थिए । ट्राभिस हेड ३९, एलेक्स क्यारी ३० तथा मिचेल स्टार्क १३ रनमा आउट भए।

वेस्ट इण्डिजका लागि शेमार जोसेफले ४ तथा जस्टिन ग्रेभ्स, जयडेन सेल्स र एण्डरसन फिलिपले समान २ विकेट लिए ।

त्यसअघि टस जितेर पहिले ब्याटिङ गरेको अस्ट्रेलियाले पहिलो इनिङमा २ सय ८६ रन बनाएको थियो । पहिलो इनिङमा वेस्ट इण्डिजले २ सय ५३ रन जोडेको थियो । अन्तिम टेस्ट आइतवार सुरु हुनेछ ।