काठमाडौं (हाम्रो खेलकुद)- मलेसियामा एसिसी यु-१६ इस्ट जोन कप विजेता नेपाली टोलीका सदस्य अभय यादवलाई काठमाडौँ क्रिकेट एकेडेमीले सोमवार सम्मान गरेको छ।

काठमाडौं बुढानिलकण्ठस्थित चुनिखेलमा रहेको ‘काठमाडौँ क्रिकेट एकेडेमी’ परिसरमा आयोजित कार्यक्रममा अभयलाई सम्मान गरिएको हो।

एकेडेमीका निर्देशक जगत टमाटा र संचालक मदन कार्कीको प्रमुख उपस्थितिमा अभयको उपलब्धिको कदर गर्दै प्रशंसा गरिएको थियो।

मधेश प्रदेश सर्लाही घर भई पछिल्लो चार महिनादेखि उक्त एकेडेमीमा नियमित प्रशिक्षणरत अभयले सिंगापुरविरुद्धको फाइनलमा ३ विकेट लिँदै प्लेयर अफ द म्याच बनेका थिए । त्यस्तै ब्याटिङमा पनि उनले अविजित १० रन जोडेका थिए।

प्रतियोगिता अभयले ५ खेलमा १० विकेट लिँदै नेपालको दोस्रो सर्वाधिक विकेट लिने खेलाडी बनेका थिए।

गत महिना सुर्खेतमा सम्पन्न टिबी शाह मेमोरियल यु-१६ प्रतियोगितामा पनि उनले ७ खेलमा १९ विकेट लिँदै उत्कृष्ट बलरको उपाधि जितेका थिए।

सोहि अवसरमा एकेडेमीका संचालक मदन कार्कीले यादवलाई आगामी दिनमा क्रिकेट प्रशिक्षणका लागि पूर्ण छात्रवृत्तिको घोषणा गरेका छन्।

‘अभयले देखाएको मेहनत, अनुशासन र लगावले आजको उपलब्धि सम्भव भएको हो। यस्ता प्रदर्शनबाट अन्य विद्यार्थी पनि प्रेरित होउन् भन्ने हाम्रो अपेक्षा छ,’ कार्कीले भने। 

एकेडेमीका निर्देशक टमाटाले पनि अभयलाई मेहनती र लगनशील विद्यार्थीको रुपमा वर्णन गर्दै भने, ‘कुनै पनि विद्यार्थीले यदि निरन्तरता, मेहनत र समर्पणका साथ अगाडि बढ्यो भने, अभयले जस्तै सफलता पाउन सक्छ।’

सम्मानित भएपछि अभय यादवले भने, ‘खेल्दा देशको भावना चाहिन्छ भन्ने कुरा प्रशिक्षक टमाटाले सधैं सिकाउनुहुन्थ्यो, मैले त्यो याद राखेर खेलेँ। मेहनत गरे सफलता पक्कै मिल्छ।’