एजेन्सी – दक्षिणी अफ्रिकाका टेस्ट कप्तान विइन मुल्डर एकै इनिङमा टोलीका लागि सर्वाधिक व्यक्तिगत रन बनाउँने खेलाडी बनेका छन् ।

जिम्बाब्वेविरुद्धको दोस्रो टेस्टको पहिलो इनिङमा मुल्डरले ३ सय ६७ रनमा अविजित रहदै सर्वाधिक रन बनाए । यसअघि अफ्रिकाका लागि सन् २०१२ मा हसिम अम्लाले इङ्ग्ल्याण्डविरुद्ध अविजित ३ सय ११ रन बनाएका थिए ।

मुल्डर टेस्ट क्रिकेटको एकै इनिङमा सर्वाधिक व्यक्तिगत रन बनाउँनेमा पाँचौ स्थानमा रहे । टेस्टमा एकै इनिङमा बनाएको सर्वाधिक रन वेस्ट इण्डिजका ब्रायन लाराको नाममा रहेको छ । लाराले सन् २००४ मा इङ्ग्ल्याण्डविरुद्ध अविजित ४ सय रन बनाएका थिए ।

मुल्डर कम बलमा ३ सय रन पूरा गर्ने दोस्रो खेलाडी बने । उनले २ सय ९७ बलमा ३ सय रन पूरा गरेका थिए । यो सूचीको पहिलो स्थानमा रहेका भारतका वीरेन्द्र सेहवागले २ सय ७८ बलमा ३ सय रन पूरा गरेका थिए ।

मुल्डर कप्तानको रुपमा एकै इनिङमा ३ सय रन पूरा गर्ने पहिलो क्रिकेटर समेत बनेका छन् । उनको अविजित ३ सय ६७ रनको सहयोगमा ५ विकेट गुमाएर ६ सय २६ रन बनाउदै दक्षिण अफ्रिकाले पहिलो इनिङ समाप्तिको घोषणा गर्यो ।

अफ्रिकाका लागि डेबिड बेडिनह्याम ८२, लुहान डिर प्रिटोरियस ७८, डिवाल्ड ब्रेबिस ३० रनमा बनाए ।

जवाफमा जिम्बाब्वे पहिलो इनिङमा १ सय ७० रनमा अल आउट हुँदै ४ सय ५६ रनले पछि पर्यो । दक्षिण अफ्रिकाले फलोअन दिएपछि लगत्तै दोस्रो इनिङको सुरुवात गरेको जिम्बाब्वेले दोस्रो दिनको खेल सकिँदा १ विकेट गुमाएर ५१ रन जोडेको छ । जिम्बाब्वे अझै ४ सय ५ रनले पछि छ ।

दुई टेस्टको सिरिजमा दक्षिण अफ्रिका १-० ले अघि रहेको छ । पहिलो टेस्ट पाहुना टोलीले ३ सय २८ रनले जितेको थियो ।