एजेन्सी – जिम्बाब्वेले घरेलु मैदानमा जारी त्रिकोणात्मक टि ट्वान्टी आई सिरिजमा लगातार तेस्रो हार बेहोरेको छ ।

दक्षिण अफ्रिकाले आइतवार जिम्बाब्वेलाई ७ विकेटले हराएको छ। १ सय ४५ रनको लक्ष्य दक्षिण अफ्रिकाले १७.२ ओभरमा ३ विकेट गुमाएर पूरा गर्यो ।

दक्षिण अफ्रिकाको जितमा कप्तान राशी भान डर डुसेन र रुबेन हरमनले अर्धशतकीय इनिङ खेले । हरमनले ३६ बलमा ३ चौका र ४ छक्काको सहयोगमा सर्वाधिक ६३ रन जोडे । तेस्रो विकेटका लागि हरमन र कप्तान राशीले १ सय ६ रनको शतकीय साझेदारी गरे ।

राशीले ४१ बलमा ६ चौकाको सहयोगमा अविजित ५२ रन बनाए । डेवाल्ड ब्रेभिस १३ रनमा अविजित रहे । जिम्बाब्वेका लागि टिनोटिन्डा मफासले २ र रिचार्ड नगर्भाले १ विकेट लिए ।

त्यसअघि टस हारेर ब्याटिङको निम्तो पाएको जिम्बाब्वेले निर्धारित २० ओभरमा ६ विकेट गुमाएर १ सय ४४ रन‌ बनाएको थियो ।

जिम्बाब्वेका लागि ओपनर ब्रायन बेननेटले ४३ बलमा ७ चौका र ३ छक्काको सहयोगमा सर्वाधिक ६१ रन बनाए। रायन बर्लले ३१ बलमा २ चौका र १ छक्काको सहयोगमा अविजित ३६ रन जोडे ।

ओपनर वेस्ली मधिभेरी १३ तथा कप्तान सिकन्दर राजा ९ रनमा आउट भए । कार्बिन बोसले २, लुंगि एन्गेडी र नान्द्रे बर्गरले समान १ विकेट लिए ।

जिम्बाब्वे अंक बिहिन रहँदै सिरिजबाट बाहिरिएको छ । दक्षिण अफ्रिका र न्युजिल्याण्ड फाइनलमा पुगेका छन् । सहभागी तीन देशबीच डबल राउण्डमा खेल भए पछि शीर्ष स्थानमा रहने दुई देशबीच फाइनल खेल हुनेछ ।

सिरिजको अर्को खेलमा मंगलवार दक्षिण अफ्रिका र न्युजिल्याण्ड खेल्नेछन् ।