एजेन्सी – वेस्ट इन्डिजका अलराउन्डर आन्द्रे रसेलको अन्तिम अन्तर्राष्ट्रिय खेल खेल्दै छन्।

जमैकामा बुधवार बिहान हुने अष्ट्रेलियाविरुद्धको दोस्रो टि ट्वान्टी आई खेलपछि रसेलले अन्तर्राष्ट्रिय क्रिकेटबाट सन्यास लिने भएका हुन् ।

ठूला हिट तथा तीव्र गतिका बलर रहेका रसेलले जमैकाको सबिना पार्कमा रहेको आफ्नो घरेलु मैदानमा अन्तिम अ‌न्तर्राष्ट्रिय खेल खेल्नेछन् ।

रसेलले वेस्ट इन्डिजका लागि एक टेस्ट, ५६ एकदिवसीय र ८५ टि ट्वान्टी आई खेलेका छन् । रसेल वेस्ट इण्डिजले सन् २०१२ र २०१६ मा टि ट्वान्टी विश्वकप जित्दा टोलीको महत्वपूर्ण सदस्य थिए ।

उनले ती खेलहरूमा २ हजार १ सय १४ रन बनाउँनुका साथै १ सय ३२ विकेट लिएका छन् । ‘म क्यारिबियनबाट आउने क्रिकेटरहरुको अर्को पुस्ताको लागि आदर्श बन्दै मेरो अन्तर्राष्ट्रिय करियर उच्च स्तरमा समाप्त गर्न चाहन्छु,’ रसेलले केही दिन अघि भनेका थिए ।

३७ वर्षीय रसेलले २०१९ देखि टि ट्वान्टी क्रिकेट मात्र खेलेका थिए । भारत र श्रीलंकामा आयोजना हुने टि ट्वान्टी विश्वकप आउन एक वर्षभन्दा कम समय बाँकी रहँदा रसेलले सन्यास लिँदैछन् ।

वेस्ट इन्डिजको प्रतिनिधित्व गर्नु जीवनको सबैभन्दा गर्वको उपलब्धि मध्ये एक रहेको रसेलले बताए ।

‘जब म सानो थिएँ, मैले यो स्तरमा पुग्ने आशा गरेको थिइनँ, तर जति धेरै तपाईं खेल्न थाल्नुहुन्छ र खेललाई माया गर्न थाल्नुहुन्छ, तपाईंले के हासिल गर्न सक्नुहुन्छ भन्ने महसुस गर्नुहुन्छ,’उनले भनेका छन्।

रसेल हालैका महिनामा वेस्ट इन्डिजबाट सन्यास लिने दोस्रो खेलाडी हुन् । निकोलस पूरनले गत महिनामा मात्र २९ वर्षको उमेरमा अन्तर्राष्ट्रिय क्रिकेटबाट सन्यास लिएका थिए ।

उनी विश्वभरको फ्रान्चाइजी लिगका लागि भने उपलब्ध रहने छन् । रसेलले टि ट्वान्टीमा भने ५ सय ६२ खेल खेल्दै ९ हजार ३ सय २४ र ४ सय ८५ विकेट आफ्नो लिएका छन् ।