एजेन्सी – भारतीय टेस्ट टोलीलाई इङ्ग्ल्याण्डविरुद्धको चौथो टेस्टअघि खेलाडीको चोटका कारण मार परेको छ ।

भारतीय कप्तान शुभमन गिलले ओल्ड ट्राफोर्डमा हुने टेस्ट अघि आयोजित पत्रकार सम्मेलनमा टोलीका महत्वपूर्ण खेलाडीहरु चोटका कारण बाहिरिएको बताएका छन् । भारतका अलराउण्डर नितिश कुमार रेड्डी सिरिजबाट बाहिरिएका छन् ।

तीव्र गतिका बलर आकाश दिप र अर्शदिप सिंहले चौथो टेस्ट गुमाउने छन् । इङ्ल्याण्ड विरुद्धको तेस्रो टेस्ट क्रममा ग्रोइनमा समस्या भएपछि आकाश दीप समयमै पूर्ण फिट हुन नसकेपछि चौथो टेस्टबाट बाहिरिएका हुन् ।

एजबस्टन टेस्टमा भारतलाई जिताउँन १० विकेट लिएका आकाश दिपको बर्हिगमनले भारतीय टोलीलाई ठूलो नोक्सानी भएको छ । आकाश दिपको स्थानमा अंशुल कम्बोज वा प्रसिद्ध कृष्ण भारतीय प्लेइङ११ मा रहने सम्भावना रहेको छ ।

आकाश दिपको स्थान कम्बोजले लिने सम्भावना छ । कम्बोजले बुधवार सुरु हुने चौथो टेस्टमा मौका पाएमा उनको डेब्यु खेल हुनेछ । कम्बोजले बलिङका साथै ब्याटिङ कारण पनि डेब्यु गर्ने सम्भावना रहेको छ ।

प्रथम श्रेणीको क्रिकेटमा उनको ब्याटिङको औसत १६.२० छ । उनले २४ खेलमा २२ छक्का प्रहार गरेका छन् । प्रसिद्धले भने ८.६ को दरले केवल १ सय ९८ प्रथम श्रेणी रन बनाएका छन्।

‘जब मैले हिजो विकेट देखेँ, त्यो त्यति ओसिलो देखिएन,” गिलले भने, “तर स्पष्ट रुपमा अब मौसमलाई हेर्दा, मलाई लाग्दैन कि विकेटले त्यो ओसिलोपन सुकाउने धेरै सम्भावना छ। त्यसैले मलाई लाग्छ कि बलरको लागि अलि बढी हुनेछ। र सामान्यतया यो स्थलमा, हामीले देखेका अन्य स्थानहरू भन्दा अलि छिटो छ। त्यहाँ अलि बढी गति र उछाल छ।’

यदि साई सुदर्शन टोलीमा फर्किए भने करुण नायरले कहाँ ब्याटिङ गर्छन् भनेर हेर्न रोचक हुनेछ। पहिलो टेस्टमा जहाँ दुवै खेलेका थिए । सुदर्शनले नम्बर ३ मा र नायरले ६ मा ब्याटिङ गरेका थिए ।

नायरले राम्रो सुरुवात गरेका छन् तर तीन टेस्टमा अर्धशतक बनाएका छैनन्। ‘हामीलाई लाग्छ करुण राम्रो ब्याटिङ गरिरहेका छन्,’ गिलले भने।

इङ्ग्ल्याण्डले चौथो टेस्ट खेल्ने आफ्नो प्लेईङ-११ घोषणा गरिसकेको छ । इङ्ग्ल्याण्डको टोलीमा तेस्रो टेस्ट खेलको टोलीमा एक परिवर्तन भएको छ । सोयब बसिरको स्थानमा लियम डसनलाई टोलीमा मौका दिइएको छ ।

५ टेस्टको सिरिजमा घरेलु टोली इङ्ग्ल्याण्ड २-१ ले अघि छ ।