एजेन्सी – न्युजिल्याण्डले जिम्बाब्वेमा जारी त्रिदेशीय टि ट्वान्टी आई सिरिजमा लगातार तेस्रो जित हासिल गरेको छ ।

हरारेमा मंगलवार आफ्नो तेस्रो खेलमा न्युजिल्याण्डले दक्षिण अफ्रिकामाथि ७ विकेटले हराएको हो। न्युजिल्याण्डले सिरिजको दोस्रो भेटमा दक्षिण अफ्रिकामाथि लगातार जित निकालेको छ ।

१ सय ३५ रनको सामान्य लक्ष्य न्युजिल्याण्डले १५.५ ओभरमा ३ विकेट गुमाएर पूरा गर्यो । ओपनर टिम साईफर्टले अविजित रहँदै अर्धशतक बनाए । साईफर्ट ४८ बलको सामना गरेर ६ चौका र २ छक्काको सहयोगमा ६६ रन बनाए ।

डेभोन कन्बे १९ तथा मार्क च्यापम्यान १० रनमा आउट हुँदा ड्रेयाल मिचेल २० रनमा अविजित रहे । दक्षिण अफ्रिकाका लागि सिनुरान मुथुस्वामीले २ र एन्डिल सिमिलानेले १ विकेट लिए ।

त्यसअघि हरारे स्पोर्टस क्लबमा टस हारेर पहिले ब्याटिङको निम्तो पाएको दक्षिण अफ्रिकाले निर्धारित २० ओभरमा ८ विकेट गुमाएर १ सय ३४ रन बनाए थियो ।

दक्षिण अफ्रिकाका ओपनर रिजा हेनड्रिक्सले ३७ बलमा ४ चौका र १ छक्काको सहयोगमा सर्वाधिक ४१ रन जोडे । एन्डिल सिमिलाने ११, डिवाल्ड ब्रेभिस १३ तथा कप्तान राशि भान डर डुसेन १४ रनमा आउट भए ।

न्युजिल्याण्डका लागि ज्याकोब डफी, एडम मिल्ने, मिचेल स्यान्टनरले समान २ तथा विल ओरुकले १ विकेट लिए । लगातार तेस्रो जित हात पारेको न्युजिल्याण्ड ६ अंकका साथ फाइनल प्रवेश गरिसकेको छ ।

दक्षिण अफ्रिका पनि फाइनल प्रवेश गरिसकेको छ । घरेलु टोली जिम्बाब्वे भने लगातार तेस्रो हारपछि लिग चरणबाट बाहिरिसकेको छ ।

फाइनम शनिवार न्युजिल्याण्ड र दक्षिण अफ्रिका नै खेल्नेछन् । लिग चरणको अन्तिम खेल बिहीवार न्युजिल्याण्ड र जिम्बाब्वे खेल्नेछन् ।