एजेन्सी – टिम डेबिडको कीर्तिमानी शतकमा पाहुना टोली अस्ट्रेलियाले वेस्ट इण्डिजलाई तेस्रो टि ट्वान्टी आईमा पनि हराएको छ ।

सेन्ट किट्स एण्ड नेभिसमा शनिवार बिहान सकिएको खेलमा अस्ट्रेलियाले ६ विकेटले जित हात पार्यो । अस्ट्रेलियाले ५ टि ट्वान्टी आई सिरिज दुई खेल अगावै ३-० ले जितेको छ ।

२ सय १५ रनको विशाल लक्ष्य अस्ट्रेलियाले २३ बल बाँकी रहँदा ४ विकेट गुमाएर पूरा गर्यो । डेबिडले ३७ बलमा ६ चौका र ११ छक्काको सहयोगमा १ सय २ रनको शतकीय इनिङ खेले ।

डेबिडले अस्ट्रेलियाका लागि सबैभन्दा कम बलमा शतक प्रहारको कीर्तिमान बनाए । यसअघि स्कटल्याण्डविरुद्ध जोस इङ्ग्लिसले ४३ बलमा शतक पूरा गरेका थिए ।

डेबिडको टि ट्वान्टी आई करियरको यो पहिलो शतक हो । पाँचौ विकेटका लागि डेबिडले मिचेल ओविनसँग १ सय २८ रनको विजयी साझेदारी गरे । ओविनले १६ बलमा २ चौका र ३ छक्का प्रहार गरे ।

ओपनर ग्लेन म्याक्सवेल ७ बलमा २०, कप्तान मिचेल मार्श १९ बलमा २२ तथा जोस इङ्ग्लिस १५ रनमा आउट भए ।

वेस्ट इण्डिजका लागि रोमारियो शेफर्डले २ तथा जेसन होल्डरले १ विकेट लिए ।

त्यसअघि वन्डर पार्क क्रिकेट स्टेडियममा टस हारेर ब्याटिङको निम्तो पाएको वेस्ट इण्डिजले कप्तान शाइ होपको शतकको सहयोगमा निर्धारित २० ओभरमा ४ विकेट गुमाएर २ सय १४ रन बनाएको थियो ।

कप्तान होपले ५७ बलमा ८ चौका र ६ छक्काको सहयोगमा अविजित १ सय २ रनको शतकीय इनिङ खेले ।

होपले टि ट्वान्टी आई करियरको पहिलो शतक बनाए पनि टोलीको जित टार्न सकेनन् । ओपनर ब्राण्डन किंगसँग होपले पहिलो विकेटका लागि १ सय २५ रनको सानदार साझेदारी गरे ।

ओपनर किंग ३६ बलमा ३ चौका र ६ छक्काको सहयोगमन ६२ रनमा आउट भए । शेरफन रादरफोर्ड १२ तथा शिमरन हिटमायर र रोभमन पावेल समान ९ रनमा आउट भए ।

अस्ट्रेलियाका लागि नाथन एलिस, एडम जाम्पा र मिचेल ओविनले समान १ विकेट लिए ।

३ टेस्ट सिरिज क्लिन स्विप गरेको अस्ट्रेलियाले टि ट्वान्टी आई सिरिज पनि जितेको छ । चौथो टि ट्वान्टी आई आइतवार हुनेछ ।